Ku-simaha Taliyaha Guutada 14-ka October ee Ciidanka Dhulka Xoogga Dalka Soomaaliyeed G/dhexe Cabdiraxiin Maxamed Munye ayaa maanta guddoomiyay Kulan balaarran oo looga hadlayay Amniga deegaanada dhaca dhinaca Xeebta ee ku teedsan Lambar-konton iyo sidii looga feejignaan lahaa Khatar kasta oo ay soo maleegaan Kooxda Khawaarijta.
Kulankan ayaa ka dhacay Xarunta Maamulka deegaanka Lambar-konton ee Gobolka Shabeellaha Hoose, waxaana uu ku soo beegmay xilli ay socdaan howlgallo Culus oo Khawaarijta looga sifeynayo Degmada Awdheegle iyo deegaanka Bariirre oo kooxdu ay xiligan ku dhuumaaleysaneyso.
G/dhexe Cabdiraxiin Maxamed Munye waxaa kulanka ku wehliyay qaar kamid ah Saraakiisha Xubnaha Maamulka Guutada 14-ka October, waxaa sidoo kale qeyb ka ahaa Gudoomiyaha deegaanka Lambar-konton Maxamed Maxamuud iyo Taliyaha Hay’adda Nabadsugidda iyo Sirdoonka Qaranka ee degmada Awdheegle iyo Aagga Lambar-konton Maaddeey Caddow Jamaame.
