Wasiiru Dowlaha Wasaaradda Gaashaandhigga, Mudane Cumar Cali Cabdi, ayaa maanta ka qeybgalay Xaflad Abaalmarin Deeq Waxbarasho oo ay 31 sarkaal oo ka tirsan Ciidanka Xoogga Dalka ka heleen Jamhuuriyadda Dadka Shiinaha.
Munaasabadda waxaa sidoo kale goobjoog ka ahaa Taliye Ku-Xigeenka Ciidanka Xoogga Dalka, S/Guuto Maadeey Sheekh Nuur Ufuroow, iyo Safiirka Jamhuuriyadda Dadka Shiinaha u fadhiya Soomaaliya, Danjire Wang Yu.
Wasiiru Dowlaha ayaa saraakiisha kula dardaarmay in ay si buuxda uga faa’iideystaan fursaddan qiimaha leh, ayna dalka ugu soo laabtaan iyaga oo xambaarsan aqoon casri ah, xirfad sare, iyo waayo-aragnimo ka jawaabeysa baahiyaha amniga ee qaranka.
Wasiir Cumar ayaa sidoo kale uga mahadceliyay Dowladda Shiinaha taageerada joogtada ah iyo garab istaagga ay siiso Dowladda Federaalka Soomaaliya.
