Ciidanka Kumaandooska Danab ee Xoogga Dalka Soomaaliyeed oo kaashanaya ciidamadda Jubbaland ayaa howlgal qorsheysan ka fuliyay deegaanno ka tirsan duleedka degmada Jilib ee gobolka Jubbada Dhexe.
Howlgalka ayaa lagu burburiyay illaa toddobo fariisin oo ay ku sugnaayeen maleeshiyaadka Khawaarijta, iyadoo ciidamada ay sidoo kale gacanta ku dhigeen agabkii yaallay fariisimahaasi.
Saraakiisha hoggaamineysay howlgalka ayaa sheegay in deegaanka Gambaale uu ahaa saldhiggii ugu weynaa ee ay Khawaarijtu ku dhuumaaleysanayeen, islamarkaana uu ka mid ahaa goobihii sida buuxda loo burburiyay.
Taliska ciidamada ayaa xusay in howlgalka uu qeyb ka yahay dadaallada joogtada ah ee lagu sugayo amniga deegaannada Jubbaland, isla markaana uu sii socon doono ilaa laga ciribtiro maleeshiyaadka Khawaarijta ee ku dhuumaaleysanaya gobolka Jubbada Dhexe.
