XIGASHO LAACIB.NET
Kooxda Arsenal ayaa guul weyn ka gaartay Leeds United kadib markii ay 5-0 ku dardareen kulan ka tirsanaa wareegga labaad ee horyaalka Premier League, garoonka Emirates.
Arsenal ayaa hoggaanka qabatay daqiiqaddii 34-aad markii Jurriën Timber uu shabaqa taabtay, halka Bukayo Saka uu dhaliyay goolka labaad daqiiqaddii 45+1.
Bilowgii qeybta labaad, daqiiqaddii 48-aad, Viktor Gyökeres ayaa gool saddexaad ku daray, ka dibna Timber ayaa mar kale shabaqa soo taabtay daqiiqaddii 56-aad. Gunners ayaa goolka shanaad heshay daqiiqaddii 90+5 markii Gyökeres uu rigooro u beddelay gool.
Guushan ayaa Arsenal gaarsiisay 6 dhibcood oo ay hoggaanka ku qabteen, halka Leeds United ay weki heysato 3 dhibcood iyagoo si ku meel gaar ah u jooga booska 11-aad.
Si kastaba, kulanka waxaa dhaawacyo ka soo gaaray Martin Ødegaard iyo Bukayo Saka, taas oo walaac ku sii kordhisay tababare Mikel Arteta.
XIGASHO LAACIB.NET
