Cali Jeyte Cusmaan oo ah U Qeybsanaha Xafiiska Madaxweynaha ee Arrimaha Ciidanka Macawisleyda ayaa ka hadlay howlgalada ka dhanka ah Alshabaab.
Cali Jeyte wuxuu digniin adag siiyay dadka shacabka ah ee ku nool deegaanada ay maamulaan Kooxda Alshabaab,isagoo ugu baaqay inay ka soo guuraan goobahaasi.
“Allow marqaati ka ahow inaan gaarsiiyay digniintaas, ogaada Alshabaab iyo inta la joogta isku si baan ula tacaamuleynaa”ayuu yiri Cali Jeyte Cusmaan.
Siyaasigaan wuxuu faray shacabka inay isaga dhex baxaan labada ciidan xili warkiisu u muuqday inay iyagu weerar yihiin.
“Cid kasta oo aan ugu tagno meelaha ay joogaan Alshabaab sida iyaga ayaan ula macaamileynaa ogaada,ka soo baxa agagaasi”ayuu yiri Cali Jeyte
Dhanka kale wuxuu ugu baaqay Baarlamaanka Soomaaliyeed inay ka fogaadaan wax kasta oo keeni kara dib u dhac siyaasadeed .
“Waxaan maqlaayay xiisad dhanka sharciga ah inuu baarlamaanka ka dhex jiro, aniga wax baan ka aqaan sharciga oo horaan uga soo mid noqday Baarlamaanka,waxaan idin leeyahay ka fogaada wax kasta oo dib u dhac keeni kara islamarkaana Caddowga dib u soo nooleyn kara”ayuu yiri Cali Jeyte Cusmaan
XAFIISKA WARARKA
DAYNIIILE.COM
