XIGASHO LAACIB.NET

Kooxda Paris Saint-Germain (PSG) ayaa guul muhiim ah ka gaartay Arsenal kadib markii ay 1-0 kaga adkaadeen lugta hore ee semi-finalka Champions League. Goolka guusha waxaa dhaliyay Ousmane Dembélé daqiiqaddii 4-aad ee ciyaarta.

Dembélé ayaa kubbad uu ka helay Khvicha Kvaratskhelia u dhameystiray si qurux badan, isagoo ka adkaaday goolhayaha Arsenal David Raya, taasoo aamusiisay taageerayaashii garoonka Emirates.

PSG ayaa si xooggan ku bilowday ciyaarta, iyadoo fursado kale ay heleen Désiré Doué iyo Fabián Ruiz, balse ma eysan helin goolal kale. Arsenal ayaa ciyaarta ku soo laabatay qeybtii dambe ee ka hor nasashada, hase yeeshee Gianluigi Donnarumma ayaa badbaadiyay dhowr fursadood oo halis ahaa oo ay heleen Gabriel Martinelli iyo Leandro Trossard.

Qeybtii labaad, Arsenal waxay u muuqatay inay keeneen goolka barbaraha markii Mikel Merino shabaqa soo taabtay, balse VAR ayaa diiday goolka sababo la xiriira offside. Donnarumma ayaa mar kale is muujiyay isagoo badbaadiyay kubbad halis ahayd oo Trossard uu toogtay.

Dembélé ayaa ciyaarta ka baxay daqiiqaddii 69-aad kadib dhaawac soo gaaray, taasoo shaki gelisay inuu ciyaari doono lugta labaad.

Inkasta oo Arsenal cadaadis badan saartay daqiiqadihii dambe, PSG waxay awooday in ay guushaas yar difaacdaan si ay lugta labaad ee ka dhici doonta Parc des Princes May 7 ugu laabtaan iyagoo leh faa’iido muhiim ah.

XIGASHO BBC SOMALI

Guddiga Tartamada ayaa ciqaabo dul dhigay dhowr ciyaartoy oo Real Madrid ah kaddib finalkii Copa del Rey.

Antonio Rüdiger waxaa la ganaaxay lix kulan, halka Lucas Vázquez uu wajahayo ganaax labo kulan ah.

Si kastaba ha ahaatee, saameynta ganaaxyadan ayaa ahaan doonta mid kooban. Rüdiger, oo dhaawac uga maqnaanaya garoomada muddo ku dhow hal bil iyo bar, wuxuu u badan yahay in inta badan ganaaxa uu ku qaato isagoo dhaawac ah, taasoo macnaheedu yahay inaysan wax badan ka beddelin xaaladdiisa inta ka hartay xilli ciyaareedka.

Iyadoo kaliya shan kulan oo La Liga ah ay ka harsan yihiin, Rüdiger wuxuu si buuxda uga maqnaan doonaa dhammaadka ololaha horyaalka.

Ganaaxa laba kulan ee Lucas Vázquez ma saameyn doono La Liga, wuxuuna u gudbi doonaa bilowga xilli ciyaareedka dambe, iyadoo laga yaabo inuu dhaqan galo wareegyada bug-baxa ee Copa del Rey.

Maadaama qandaraaskiisu dhacayo bisha Juun, ayna jirto hubanti la’aan ku saabsan mustaqbalkiisa Real Madrid, Vázquez waxaa laga yaabaa inuusan ganaaxaasi xitaa ku qaadan kooxda.

Go’aan muhiim ah ayaa sidoo kale lagu gaaray in Jude Bellingham laga dhaafo ganaaxa, kaddib markii Real Madrid soo bandhigtay muuqaallo ka hor imanaya warbixintii garsooraha ee keentay in la siiyo kaarka cas.

XIGASHO LAACIB.NET

Lamine Yamal ayaa si adag ugu jawaabay taageerayaal ka tirsan Real Madrid oo ku eedeeyay inuu yahay mid isla weyn oo kibir badan.

Kaddib guushii cajiibka ahayd ee Barcelona ka gaartay Real Madrid 3-2 kulan ka tirsan Copa del Rey, Yamal ayaa la weydiiyay fikirkiisa ku aaddan eedeymaha, wuxuuna si kulul uga jawaabay arrinta: “Haddii ay guuleystaan, markaas ha i dhahaan sidaas.”

Garabka 17-jirka ah ayaa door muhiim ah ka qaatay guushii Barcelona, isagoo caawiyay finalkii labo gool oo muhiim ah.

Inkasta oo Barcelona 2-1 lagu hoggaaminayay 10-kii daqiiqo ee ugu dambeysay, haddana waxay sameeyeen soo laabasho cajiib ah, iyadoo Ferran Torres uu barbareeyay daqiiqaddii 84-aad, Jules Kounde-na uu goolka guusha dhaliyay waqtigii dheeriga ahaa.

Isku kalsoonaanta Yamal ayaa dareen badan dhalisay, balse wuxuu u muuqdaa mid aan ka welwelsanayn dhaleeceynta. Wuxuu rajeynayaa inuu sii wato qaab ciyaareedkiisa wanaagsan marka ay Barcelona la kulanto Inter Milan, taasoo noqon karta ciyaartiisa 100-aad ee uu u safto kooxda.

In kasta oo lala barbardhigo Lionel Messi, oo xilligii uu da’daas ahaa kaliya toddobo kulan u ciyaaray Barcelona, Yamal ayaa iska diiday in uu is barbar dhigo halyeyga reer Argentina.

XIGASHO LAACIB.NET

Tababaraha FC Barcelona, Hansi Flick, ayaa si cad uga cadhooday lix ciyaaryahan oo kooxdiisa ka tirsan intii lagu jiray tababarkii ugu dambeeyay kahor kulanka wareega semi-finalka Champions League ee ay la ciyaarayaan Inter Milan.

Lamine Yamal, Fermín, Gavi, Ansu Fati, Iñigo Martínez, iyo Ronald Araujo ayaa lagu arkay iyagoo kasoo daahay tababarka, taasoo keentay caro uu Flick muujiyay.

Tababarka oo socday wax ka badan saacad ayaa dib u dhacay 45 daqiiqo sababo la xiriira fadhi fiidyow oo dheeraaday.

Inkasta oo ay soo daaheen, lixda ciyaaryahan waxay si caadi ah u dhamaystireen tababarka.

Barcelona ayaa la ciyaari doonta Inter Milan Arbacada kulan muhiim ah oo Champions League ah.