XIGASHO LAACIB.NET
Xaaladda Chelsea ee hadda waa mid kacsan ka dib markii shaqada laga ceyriyay Enzo Maresca maalintii Sanadka Cusub (January 1, 2026). Sababta ugu weyn ee ceyrintiisa ayaa lagu sheegay inay tahay isku-dhac dhex maray isaga iyo maamulka sare, gaar ahaan ka dib markii ay soo baxday in Maresca uu wadahadallo qarsoodi ah la yeeshay Manchester City si uu u beddelo Pep Guardiola.
Sidoo kale, maamulka Chelsea kuma qanacsanayn qaabka uu Maresca u maareeyay dhaawacyada ciyaartoyda iyo barbardhacii 2-2 ee Bournemouth oo taageerayaashu ku hooriyeen.
Kulanka berrito oo Axad ah (January 4, 2026) ay Chelsea la ciyaari doonto Manchester City, waxaa kooxda si ku-meel-gaar u hoggaamin doona tababaraha da’yarta (U-21) ee Calum McFarlane.
McFarlane ayaa qabtay shir jaraa’id ee ka hor ciyaarta, isagoo xaqiijiyay in howsha loo igmaday ay tahay mid culus. Waxaa la filayaa inuu shaxda ku soo bilaabo ciyaartoy ay ka mid yihiin Cole Palmer iyo Enzo Fernandez, inkastoo Moises Caicedo uu ku maqnaan doono ganaax.
Liam Rosenior ayaa weli ah ninka ugu horreeya ee loo malaynayo inuu noqon doono tababaraha rasmiga ah. Isagoo maanta la hadlayay warbaahinta Faransiiska ka hor ciyaarta kooxdiisa Strasbourg ay la leedahay Nice, wuxuu sheegay inuu ka warqabo hadal-haynta jirta balse uu hadda diiradda saarayo shaqadiisa Strasbourg.
Si kasta ha ahaatee, Fabrizio Romano iyo ilo kale ayaa sheegaya inay Chelsea iyo Rosenior aad ugu dhow yihiin heshiis final ah, waxaana laga yaabaa in lagu dhawaaqo toddobaadka soo socda haddii wax walba ay u dhacaan sidii loogu talagalay.
XIGASHO LAACIB.NET
