Taliyaha Ciidanka Haramcad Dhamme Abdihakiin Siciid Eeldheer ayaa maanta si rasmi ah tababar ugu soo xiray Ururka 3aad, Horintiisa 1aad ee Kumaandooska Haramcad kuwaas oo muddadii la soo dhaafay tababar gaar ah ku qaadanayay.
Munaasabadda waxaa ka qeyb galay saraakiil ka tirsan Ozel Harekat iyo mas’uuliyiin amni. Tababarkan ayaa qayb ka ah dadaallada Dowladda Federaalka ee lagu xoojinayo tayada iyo awoodda Ciidamada Qalabka Sida.
Taliyaha Haramcad ayaa xusay muhiimadda ay leedahay joogteynta tababarada iyo qalabaynta si loo helo ciidan awood u leh la dagaallanka argagixisada.
Ciidanka dhameystay carbiska waxa la baray ka jawaabista degdegga ah, ka hortagga weerarada argagixisada, iyo farsamooyinka howlaha gaarka ah.
Tan iyo magacaabistii Taliyaha, waxaa muuqda isbeddel weyn oo ku aaddan tayeynta iyo dhiirrigelinta jiilka cusub ee Haramcad.
