Ciidamada ammaanka Maamulka Puntland ayaa gacanta kusoo dhigay Nin ku eedeysan inuu dhawaan fal isugu jiray kufsi iyo dil Gobolka Sool ugu geystay gabar lagu magacaabi jiray Aamina Faarax Colaad, taasi oo Meydkeeda laga helay miyiga Berda-dawanle.

Ciidanka ammaanka ayaa howlgalo maalmo qaatay kadib  gacanta kusoo dhigay Ninka falkaas kufsiga iyo dilka ku eedeysan, sida uu warbaahinta u sheegay Guddoomiye ku-xigeenka Guddiga KMG doorashooyinka Puntland Cali Jaamac Faarax.

Guddoomiye Cali Jaamac oo warbaahinta kula hadlay Magaalada Garoowe ayaa waxaa uu xaqiijiyey in Ninka dilay marxuumad Aamina Faarax Colaad ee Meydkeeda laga helay miyiga Berda-dawanle oo ka tirsan degmada Taleex ee Gobolka Sool lasoo qabtay.

Dhacdadan ayaa waxa sidoo kale horay uga hadlay Guddoomiyaha Xafiiska Difaacaha Xuquuqda Aadanaha Maamulka Puntland Siciid Cabdi Muumin, isagoo ku baaqay in si deg deg ah gacanta loogu soo dhigo cid kasta lala xiriiriyo falkaas.

Deegaano ka tirsan dowlad Goboleedka Puntland ayaa waxaa marar kala duwan ka dhacay falal isugu jiray kufsi iyo dil loo geysteen rag oo intooda badan gacanta lagu soo dhigay, kadibna la horgeeyay Maxkamad oo xukumo dil iyo xarig ku riday.

LEAVE A REPLY

Please enter your comment!
Please enter your name here