Muqdisho (dayniiile.com)-Wasiiro iyo Xildhibaano ka tirsan Dowlada Soomaaliya ayaa maanta Muqdisho ugu sameeyay Munaasabad sagootin ahayd Safiirka cusub ee Soomaaliya u fadhin doona Dalka Kenya mudane Jabriil Ibraahim Cabdulle kaasoo dhawaan Madaxweyne Xasan uu ku badalay Safiirkii hore Maxamuud Axmed Nuur Tarsan.
Mubaasabada oo uu soo qaban qaabiyay Xildhibaan Yaasiin Fareey ayaa ka dhacday gudaha Garoonka diyaaradaha Aadan Cade ee Magaalada Muqdisho.
Kulanka waxaa hadalo guubaabo iyo sagootin ah ka jeediyay masuuliyiin ay ka mid yihiin Wasiirka dhalinyarada iyo Ciyaaraha Soomaaliya Maxamed Barre Maxamuud , Wasiir Ku xigeenka Wasaaradda Arrimaha Dibedda Soomaaliya Isaaq Maxamuud Mursal iyo Wasiir Ku Xigeenka Caafimaadka Dr Maxamed Xasan Maxamed Bulaale iyagoo kula dardaarmay safiirka cusub inuu sii wado dadaalka iyo shaqada hortaalo iyagoo u rajeeyay inuu alle u fududeeyo.
Wasiir Ku xigeenka Wasaaradda Arrimaha Dibedda Soomaaliya Isaaq Maxamuud Mursal ayaa kulanka ka sheegay in Danjire Tarsan shaqo wanaagsan uu qabtay intii uu xilkaasi hayay isagoona Danjiraha cusub u rajeeyay inuu halkaas ka sii wado shaqada Safaarada Kenya.
Safiirka cusub Jabriil Ibraahim Cabdulle.oo gunaanadka munaasabada hadal ka jeediyay ayaa amaanay una qiray Safiirkii hore Maxamuud Axmed Nuur Tarsan inuu shaqo wanaagsan ka qabtay Safaarada.
“Safiir Tarsan shaqo fiican ayuu qabtay,anigana halkaas ayaan ka sii wadayaa Insha Alalah”ayuu yiri Safiirka cusub
Dhanka kale Safiir Jibriil Ibraahim Cabdulle ayaa wuxuu uga mahad celiyay dhamaan ka soo qeybgalayaasha sagootinta ay u sameeyeen sida Xildhibaanada iyo Wasiirada.
XAFIISKA WARARKA
DAYNIIILE.COM
