Gudoomiyihii hore ee Gobolka Banaadir Maxamed Axmex Amiir ayaa goor dhaw barihiisa bulshada ku cadeeyay in bessha uu ka dhashay ee Mataan Cabdulle ay kulan la yeesheen Madaxweynaha Somalia Xasan Sheekh kaasoo looga hadlay arimo xasaasi ah.
Hadaba halkaan ka akhriso:-
Shirkii Beesha Mataan Cabdulle iyo Madaxweynaha: Dardaaran iyo Digniin
Beesha Mataan Cabdulle ayaa kulan taariikhi ah la yeelatay Madaxweyne Xasan Sheekh, kaas oo diiradda lagu saaray dhul ballaaran oo beesha deggen tahay lagana fulinayo mashaariic qaran.
Madaxweynaha ayaa beesha ku dhiirrigeliyay inay soo sameystaan guddi rasmi ah oo ururiya baahida, rabitaanka iyo waxa lagu beddelanayo dhulka ay dowladda ku wareejinayaan.
Arrintani waa isbeddel fac weyn, maadaama dhulkan ay beesha nolol iyo dhaqan ku tiirsanayd maanta loo wareejinayo dowladda.
Sidaas darteed, waxaa lama huraan ah in hogaamiyayaasha beesha ay doortaan wakiillo aqoon iyo khibrad dowladeed leh, si sharaf iyo mas’uuliyad lehna ula xaajoon kara dowladda, halkii laga dooran lahaa shakhsiyaad dano gaar ah wata ama dowladda u shaqeeya si looga fogaado dana is jiira (Conflict of Interest)
Dardaaran iyo digniin:
Beesha waa inay iska ilaalisaa guddi aan aqoon iyo waayo-aragnimo lahayn, ayna doortaan dad u qalma matalaadda danahooda oo aan lahayn damac shakhsiyadeed. Taariikh ayaa qormeysa, waana isbeddel aan dib loo celin karin.
Mas’uuliyadda Dowladda iyo Madaxweynaha:
Madaxweyne Xasan Sheekh waxaa saaran mas’uuliyad saddex weji leh: mid madaxweynenimo, mid odaynimo iyo mid tolnimo. Dowladda waa inay hubisaa in xuquuqda iyo danaha dadka deegaanka la ilaaliyo, magdhowna lagu bixiyo si waafaqsan xeerarka caalamiga ah, si looga fogaado dacwado keena hakad mashaariicda mustaqbalka ku yimaada.
Faa’iidooyinka dadka deegaanka:
• Magdhow cadaalad ah (lacag ama dhul kale).
• Shaqooyin iyo tababar dhalinyarada deegaanka.
• 40% qoondo dhulka soo haray oo ay dadka deegaanka ka faa’iideystaan.
• Kaabayaal bulsho (dugsiyo, isbitaallo, ceelal, waddooyin).
• Sanduuq horumarineed oo joogto ah (caafimaad, waxbarasho, dhaqaale).
Faa’iidooyinka Qaranka:
• Kaabayaal casri ah (garoon cusub, deked cusub, aag ganacsi xorta ah).
• Koboc dhaqaale iyo maalgelin shisheeye.
• Dakhliga dowladda oo kordha canshuur iyo adeegyo.
• Sumcad iyo xiriir caalami oo kor u kaca.
Mashruucan wuxuu noqon karaa mid beddela nolosha dadka deegaanka iyo qaranka, haddii loo maamulo si cadaalad iyo waddaniyad ku dhisan. Madaxweynaha ayaa lagu ammaanayaa kaalintiisa, iyadoo xilligisa uu ku soo aaday mashruuc qiime weyn leh.
