XIGASHO LAACIB.NET
Kooxda Liverpool ayaa si rasmi ah ugu dhawaaqday qorshe ay lambarka 20aad uga dhigeyso mid aan la xiran oo noqda xusuusta xiddigii geeriyooday ee Diogo Jota, kaasoo door muhiim ah ka qaatay guushii kooxda ee xilli ciyaareedkii 2024–25.
Diogo Jota, oo si lama filaan ah u geeriyooday kadib shil gaari, ayaa ku dhammeystay noloshiisa ciyaareed isagoo ku guuleystay horyaalka Premier League iyo UEFA Nations League, taasoo noqonaysa dhammaystir murugo leh oo noloshiisa ciyaareed ku soo idlaatay.
Liverpool ayaa shaacisay in lambarka 20aad la galin doono buuga dahabiga ah ee taariikhda kooxda, maadaama uu Jota qeyb muhiim ah ka qaatay hanashada horyaalkii 20aad ee kooxda. Waxaa si gaar ah loo xasuusan doonaa goalkii uu ka dhaliyay kooxda Everton ciyaartii Merseyside derby ee bishii April, taasoo noqotay goolkiisii ugu dambeeyay noloshiisa, kana dhigtay halyeey ka dhex ifa Anfield.
Jota ayaa horay u sheegay:
“In aan gaaro xilli ciyaareedkan, anigoo hantay horyaal aan muddo dheer raadinayay, anigoo ka ciyaaraya horyaalka ugu fiican adduunka — horyaal aan ku riyoon jiray carruurnimadaydii — waa xilli aan qalbigeyga weligey ku xafidi doono.”
Liverpool waxay go’aankan ku caddeysay sida ay u qadarineyso waxqabadka iyo saameynta uu Jota ku lahaa kooxda iyo taageerayaasha. Lambarka 20aad wuxuu hadda noqon doonaa astaan lagu xusuusto xiddig si kedis ah uga baxay dunida, balse raadkiisa uu weligii ka muuqan doono Anfield.
