Kooxda Liverpool ayaa dalab ku dhow €80 milyan ka gudbisay weeraryahanka reer France ee Hugo Ekitike, sida uu sheegay wariye Dave OCKOP, hase yeeshee kooxda Eintracht Frankfurt ayaa weli ka madax-adeegeysa kuna adkeysanaysa in la siiyo lacag ka badan midaas.
Agaasimaha ciyaaraha Liverpool, Richard Hughes, ayaa hore u baadhay suurtagalnimada la wareegidda Alexander Isak oo Newcastle ka tirsan, balse wararka waxay sheegayaan in Ekitike uu ahaa bartilmaameedkooda koowaad tan iyo furitaanka suuqa kala iibsiga — mana ahan doorasho labaad oo kaliya.
Hugo Ekitike, oo 23 jir ah, ayaa si cad u muujiyay doonistiisa ah inuu u wareego Anfield, iyadoo wakiilladiisu si rasmi ah ugu gudbiyeen rabitaankiisa kooxda Eintracht Frankfurt.
Liverpool oo caan ku ah dhaq-dhaqaaqyo degdeg ah marka ay ciyaartoy doonayaan, ayaa la filayaa in ay si dhakhso leh u dhammeystiri karto heshiiskan, maadaama wada-xaajoodyadu hadda u socdaan si degdeg ah.
Haddii labada kooxood isku afgartaan qiimaha kama dambaysta ah, Ekitike ayaa noqon kara saxiix muhiim ah oo xoojinaya weerarka Liverpool kahor bilowga xilli ciyaareedka cusub.
