Madaxweynaha Maamulka Somaliland C/raxmaan Cirro ayaa goor dhaw bartiisa Facebook wuxuu ku sheegay inuu shir caalami ah kaga qeyb-galay Magaalada Dubai ee Xarunta Dalka Imaaradka Carabta.
Ciro wuxuu sheegay in shirkaani yahay madal caalami ah oo isu keenta hoggaamiyeyaal dawladeed, khubaro iyo hay’ado caalami ah,wuxuu xusay C/raxman Cirro in shirkaan looga hadlay mustaqbalka hoggaaminta, hal-abuurka, tiknoolajiyadda casriga ah, iyo horumarinta nidaamyada dawladnimo.
Haddaba C/raxmaan Cirro qoraalkiisa oo sidiisa u qoran halkaan ka daawo:-
Waxa aan sannadkii labaad oo xidhiidh ah ka qayb-galay World Government Summit oo ka qabsoomay magaalada Dubai.
Shirkani waa madal caalami ah oo isu keenta hoggaamiyeyaal dawladeed, khubaro iyo hay’ado caalami ah, si qoto dheerna looga wada hadlo mustaqbalka hoggaaminta, hal-abuurka, tiknoolajiyadda casriga ah, iyo horumarinta nidaamyada dawladnimo ee waara.
Waxaa sharaf weyn ii ah, anniga oo metelaya Jamhuuriyadda Somaliland, isla markaana muujinaya doorka ku aaddan horumarinta dawladnimada, maamulka hufan, iyo xoojinta iskaashiga caalamiga ah, in aan kulammo midho-dhal ah la yeelanay hoggaamiyeyaal, maal-qabeenno, iyo daneeyayaal caalami ah oo muujiyey xiise dhab ah iyo diyaar-garow ay ku maal-gashadaan Jamhuuriyaddeenna Somaliland.
