XIGASHO LAACIB.NET
Real Madrid ayaa goor sii horreysay shaacisay ineysan dooneyn iney iibisoRodrygo, inkastoo uu khabiirka suuqa kala iibsiga Fabrizio Romano sheegay in Manchester City ay bartilmaameedsanayaan Rodrygo oo loo arko “saxiix riyo ah.”
Ilo ku dhow xerada tababarka Valdebebas ayaa xaqiijiyay inaysan jirin wax dalab rasmi ah oo loo soo gudbiyay 24-jirka reer Brazil, kaas oo heshiis kula jira kooxda ilaa 2028 isla markaana mar kale caddeeyay go’aankiisa ah inuu ku sii nagaanayo Santiago Bernabéu.
Inkasta oo Pep Guardiola uu si weyn u qaddariyo, Real Madrid waxay caddeysay in kaliya uu dhaqaaq dhici karo haddii Rodrygo uu ogolaado, iyadoo qiimihiisa la dul dhigay €100 milyan.
Si kastaba ha ahaatee, gudaha kooxda waxaa jira walaac ku saabsan kaalinta xaddidan ee Rodrygo, taas oo lagu muujiyay 92 daqiiqo oo kaliya oo uu ciyaaray koobkii adduunka ee FIFA Club World Cup.
Tani waxay dhalisay hadal heyn, balse Rodrygo ayaa si cad u sheegay inuu diyaar u yahay inuu u dagaallamo booskiisa Bernabéu. Maadaama aysan jirin wax dalab ah oo miiska saaran iyo go’aankiisa sii joogista oo weli xooggan, Real Madrid waxay diiradda saareysaa joogteynta kooxda iyadoo isku diyaarineysa xilli ciyaareedka cusub ee LaLiga.
XIGASHO LAACIB.NET
