MUQDISHO (DAYNIILE.COM)-Maxkamada Ciidamada qalabka sida ee Dowlada Soomaaliya waxaa maanta ka soo muuqday sedex eedeysane oo dhamaantood ka tirsan ciidamada Milateriga kuwaasoo ku eedeysan fal dhac ahaa iyo waliba dhaawac halis ah oo ay u gaysteen nin Moota-bajaaj watay.
Dhibane C/kariin Ibraahim Caddow oo watay moota-bajaajta waxaa si gaar ah u toogtay mid ka mida sedexda eedeysane kaasoo xabad AK 47 ah kaga dhuftay madaxa,wuxuu soo maray xaalado kala duwan oo koomo ay ku jirto ilaa hadana waa dhimane lafihii ka jabay madaxiisa ay dhanka maskaxda u degeen.
Eedeysanayaasha Maxkamada ka soo muuqday waxay ka wada tirsan yihiin Ururka 3-aad guutada 27-aad ee Ciidamada Gun-gaar waxayna kala yihiin:-
1-Dable Xoogga Xasan Ibraahim C/laahi
2-Dable Xoogga Hanad Nuur Maxamed
3-Dable Xoogga Mahad Maxamuud Salaad
Xafiiska xeer ilaalinta ayaa ku soo eedeeyay sedexdaan askari inay ka talaabeen xadka awooda sharciyeed ee ciidanimo ayna awoodooda u istaacmaaleen si qaldan islamarkana dhigteen isbaaro wadada isku xirta Muqdisho io Balcad.
Dable Xoogga Xasan Ibraahim C/laahi waxaa si gaar ah loogu heystaa inuu yahay aksariga dhaawaca culus gaarsiiyay dhibane C/kariin Ibraahim Caddow halka dhamaantood ay iskula eedeysan yihiin inay Mobile ka dhaceen nin mootada saarnaa.
Guud ahaan eedeysanayaasha markii fursad loo siiyay inay hadlaaan waxay isku difaaceen inaysan dhac u socon balse roob da’ayay darteed ay doonayeen inay mootyada raacaan sidaasna is faham daradu ku timid.
Si kastaba Gudoomiyaha Maxkamada ayaa dhageysiga soo xirey isagoo sheegay inay dib go’aan ka qaadan doonaan ay xukunka ridi doonaan.
XAFIISKA WARARKA SIYAASADA
DAYNIILE.COM
