Sida aan ka soo xiganay Dowlada Ciidanka Xoogga Dalka Soomaaliyeed, gaar ahaan Ururada 144-aad iyo 145-aad ee Guutada 14-ka October ayaa howlgal qorsheysan oo sifeyn ahaa maanta ka fuliyay tuulooyin hoostaga deegaanka Janaale ee Gobolka Shabeellaha Hoose oo ay gabbaad ka dhiganayeen Maleeshiyaad katirsan Khawaarijta.
Taliyaha Guutada 14-ka October ee Ciidanka Dhulka Xoogga Dalka Soomaaliyeed G/le dhexe Cabdiraxiin Maxamed Munye ayaa Xaqiijiyay inta uu howlgalka socday inay Geesiyaasha Qarankeenna si gaar ah ubeegsadeen dooman ay Khawaarijta isaga kala gudbi jireen labada dhinac ee Wabiga, laguna guuleystay in la burburiyo doomankaas iyo goobo kale oo ay Khawaarijta si dhuumaaleysi ah baad uga qaadan jirtay Shacabka Beeraleyda ah.
Howlgalka ayay Libaaxyada Qarankeenna si gaar ah uga fuliyeen Tuulooyinka kala ah “Malable, Beeraha baay, Siigaale bari iyo Doonkaa-daafeedow” waxayna dhamaantood hoostagaan deegaanka Janaale ee Gobolka Shabeellaha Hoose.
