Muqdisho (dayniiile.com)-Waxaa Maanta la hadal hayay inay Baydhabo ku wajahan yihiin siyaasiyiinta isbadal doonka reer Koonfur Galbeed kuwaasoo markii danbe la xaqiijiyay inay baaqdeen.
Haddaba Maxamed Mursal Sh. C/raxmaan Gudoomiyihii hore ee Baarlamaanka kana mida siyaasiyiinta isbadal doonka ayaa VOA-da laanteeda Afka Soomaaliga wuxuu uga waramay sababtii keentay inay baaqdaan madaama hadal heyn hore u jiray ay ahayd in Madaxweynaha Koonfur-Galbeed C/casiis Lafta-gareen uusan ogeleyn inay tagaan Baydhabo qolooyinka mucaaradkiisa ah ee isbadal doonkana ah.
Maxamed Mursal ayaa u sheegay VOA-da inay u baaqdeen codsi uga yimid dhanka Madaxweynaha Soomaaliya oo maalmihii ugu danbeeyay ku dhex jirey xurgufta u dhexeysa siyaasiyiinta reer Koonfur Galbeed.
Maxamed Mursal wuxuu xusay inay berito oo jimco ah ay u safri doonaan Dhuusa-mareeb islamarkaana ay la kulmi doonaan Madaxweynaha Soomaaliya Xasan Sheekh.
“Baydhabo waxaan ugu soconay inaan bulshada kala tashano laba qodob oo kala ah doorka nooga aadan dagaalka Dowladu kula jirto Alshabaab iyo qabsoomida doorashoooyinka Koonfur-Galbeed waliba waqtigii lagu balamay ”ayuu yiri Maxamed Mursal
Siday wax u socdaan waxaa muuqata in Madaxweyne Xasan uu wali u kala garqaadayo labada dhinac iyadoo 2 maalin ka hor Dhuusa-mareeb uu kula kulmay C/casiis Lafta-gareen.
XAFIISKA WARARKA
DAYNIIILE.COM
