Ciidanka Hay’adda Nabadsugidda iyo Sirdoonka Qaranka ee Koonfur Galbeed (NISA-KGS) ayaa maanta soo bandhigtay afar xubnood oo ka tirsanaa Khawaarijta kuwaas oo isku soo dhiibay kadib markii ay ka quusteen dhibaatada iyo cadaadiska ay bulshada ku hayeen.
Xubnahan oo ka tirsanaa jabhadda Khawaarijta ayaa si iskood ah isu soo dhiibay, waxaana ay sheegeen in ay dulqaad u waayeen dhibaatooyinka joogtada ah ee Khawaarijtu ku hayaan shacabka iyo dagaallada lagu afjarayo, taas oo ku khasabtay in ay ka tanaasulaan fikirkii ay ku jireen.
Afarta isasoo dhiibtay ayaa dowladda iyo shacabka Soomaaliyeed ka codsaday in la cafiyo, si ay ugu soo biiraan bulshada Soomaaliyeed ee nabadda iyo horumarka ku taamaysa.
Muddooyinkii u dambeeyay ayaa guud ahaan dalka ka socda howlgal ballaaran oo lagu ciribtirayo Khawaarijta ku dhuumaaleysanaya qaybo ka mid ah dalka, iyadoo ciidanka qalabka sida iyo shacabka Soomaaliyeed ay iskaashanayaan sidii looga takhalusi lahaa cadowga ummadda.
