Agaasimaha Guud ee Hay’adda Socdaalka iyo Jinsiyadda Soomaaliya Mudane Mustaf Dhuxuloow ayaa kulan gaar ah kula yeeshay xarunta dhexe ku dhawaad 30 Uqaybsanayaasha HSJ ee safaaradaha iyo qunsuliyadaha Dowladda Federaalka Soomaaliya ee ku leedahay dalalka caalamka.
Kulankan ayaa lagu falanqeeyay xaaladda adeegyada socdaalka iyo jinsiyadda oo ay muwaadiniinta Soomaaliyeed ka helaan dibadda, iyadoo la dhagaystay caqabadaha jira iyo warbixinnada ku saabsan habsami u socodka howlaha. Waxaa kale oo lagu gorfeeyay qorshaha dib-u-habaynta iyo horumarinta shaqada, si loo fududeeyo adeegyada laguna dardargeliyo habraacyada casriga ah ee ay hay’addu ku taageerto shacabka Soomaaliyeed.
Agaasimaha Guud ayaa kala hadlay Uqaybsanayaasha muhiimadda ay leedahay xoojinta wada shaqaynta hay’adaha dowladda iyo isku xirka joogtada ah ee safaaradaha iyo xarunta dhexe ee HSJ. Waxa uu sidoo kale faray Uqaybsanayaasha in ay xoogga saaraan hagaajinta shaqada, fududeynta adeegyada, iyo ilaalinta sumcadda qaranka, si muwaadiniinta Soomaaliyeed ee dibadda jooga ay u helaan adeeg degdeg ah oo hufan.
