XIGASHO LAACIB.NET

Xiddiga reer Portugal ee Cristiano Ronaldo ayaa ballaariyay maalgashiyadiisa isaga oo  kaashanaya agaasimaha British-ka ah Matthew Vaughn si ay u aasaasaan shirkad filimaan sameysa oo madax bannaan oo lagu magacaabo UR·MARV.

Shirkaddan cusub ayaa horey u maalgelisay una soo saartay laba filim oo (action) ah, waxaana haatan laga shaqaynayaa filimkii saddexaad oo isla taxanahaas ka mid ah. Waxaa la filayaa in taariikhda la sii dayn doono filimka ugu horreeya dhowaan la shaaciyo.

Tani waxay qayb ka tahay ganacsiyo badan oo Ronaldo leeyahay, kuwaas oo ay ka mid yihiin:

CR7 Brand – Calaamadda noolosha oo ay ku jiraan dhar, kabaha iyo cadarka

Pestana CR7 Hotels – Hoteello uu iska kaashaday shirkadda Pestana, kuna yaalla magaalooyin ay ka mid yihiin Lisbon iyo Madrid

CR7 Fitness – Xarumo jimicsi oo caafimaadka iyo jir dhiska dhiirrigeliya

Insparya – Xarumo caafimaad oo ku takhasusay beerista timaha

7EGEND – Shirkad dijitaal ah oo diiradda saarta hal-abuurka iyo tignoolajiyada

Ursu9 – Calaamad ganacsi oo xiriir la leh Ronaldo

Chrono24 – Suuq online ah oo loogu talagalay saacadaha raaxada

WHOOP – Shirkad sameysa qalabka lagu cabbiro waxqabadka jirka

Medialivre – Shirkad warbaahineed

Bioniq – Shirkad nafaqo gaar ah u samaysa dadka

ZujuGP – Barxad dijitaal ah oo isku xirta taageerayaasha iyo ciyaartoyda kubadda cagta

TOTÓ – Maalgashi kale oo uu Ronaldo leeyahay

Lisboa Racket Centre for Padel – Xarun ciyaaraha padel-ka oo ku taalla Lisbon

AVA – Mid kale oo ka mid ah ganacsiyada Ronaldo

Iskaashiga Ronaldo iyo Vaughn wuxuu muujinayaa sida uu Ronaldo u doonayo inuu saameyn weyn ugu yeesho warshadaha madadaalada, isaga oo horayba uga jiray heerar sare oo ciyaareed iyo ganacsi.

XIGASHO LAACIB.NET

Weeraryahankii hore ee xulka Brazil iyo kooxda Barcelona, Ronaldinho, ayaa magacaabay xiddiga uu u arko in uu ahaa kan ugu bandhigga fiicnaa wareeggii siddeeda ee tartanka Champions League ee xilli ciyaareedkan.

Ronaldinho oo sidoo kale hore ugu ciyaaray kooxda Paris Saint-Germain (PSG), ayaa si gaar ah u amaanay Ousmane Dembélé, isagoo xusay inuu si weyn uga helay qaab ciyaareedkiisa kulamadii ugu dambeeyay.

Isagoo la hadlayay wargeyska Faransiiska ee L’Équipe, Ronaldinho ayaa sheegay: “Ma jecli inaan is barbar dhigo ciyaartoyda, laakiin mar walba waxaan eega kooxaha aan horay uga mid ahaa iyo kuwa weli ciyaaraya Champions League.”

“PSG waxaa jooga Ousmane Dembélé. Wuxuu leeyahay tayo sare oo aad u gaar ah. Aad ayaan uga helay qaab ciyaareedkiisa — waxa uu leeyahay qaab Brazilian ah,” ayuu yiri Ronaldinho.

Dembélé ayaa bandhig cajiib ah ka sameeyay wareeggii siddeeda, taasoo sababtay in halyeyga reer Brazil uu si gaar ah u xuso, iyadoo PSG ay u gudubtay wareegga afar-dhamaadka tartanka.

XIGASHO LAACIB.NET

War Deg-deg ah: Barcelona oo la kulantay wakiilka Hansi Flick si ay uga wadahadlaan qodobo ay ka mid tahay cusboonaysiinta qandaraaskiisa.

Sida ay warisay SPORT, kooxda Barcelona ayaa dhawaan la kulantay wakiilka tababare Hansi Flick, Pini Zahavi, si ay uga wadahadlaan dhowr arrimood, oo ay ugu muhiimsan tahay cusboonaysiinta qandaraaska Flick.

Kooxda ayaa si weyn ugu qanacsan waxqabadka Flick waxayna doonaysaa inay dhamaystirto heshiis laba sano ah oo cusub, kahor inta aysan tartamada dhammaan. Barcelona waxay u aragtaa Flick inuu yahay tababaraha ugu habboon ee kooxda. Labada dhinacba waxay muujiyeen rabitaan buuxa oo ay ku doonayaan inay sii wada shaqeeyaan.

Hansi Flick ayaa loo magacaabay tababaraha Barcelona bishii May 2024, isagoo bedelay Xavi Hernández. Qandaraaskiisa hore wuxuu soconayaa ilaa Juun 2026.

Intii uu xilka hayay, Flick wuxuu kooxda u horseeday qaab ciyaareed cadaadis leh oo xamaasad badan, taas oo la jaanqaadaysa falsafadda kubbadda cagta ee Barcelona.

Go’aanka degdega ah ee ay kooxda uga shaqeynayso cusboonaysiinta qandaraaska Flick wuxuu muujinayaa kalsoonida ay ku qabaan hoggaamintiisa iyo aragtidiisa mustaqbalka kooxda. Iyagoo doonaya inay xasillooni dhisaan, Barcelona waxay rajeenaysaa inay horumar sii gaarto iyadoo Flick hoggaanka hayo.

XIGASHO LAACIB.NET

Paul Merson, oo hore ugu ciyaari jiray Arsenal, ayaa uga digay kooxdiisii hore in aysan wali dhammaanin ciyaarta wareega siddeeda ee Champions League ee ay la leeyihiin Real Madrid.

Arsenal ayaa talaabo weyn hore u qaaday kadib markii ay 3-0 kaga adkaadeen Real Madrid kulan ka dhacay garoonkooda Emirates, habeenkii Talaadada.

Ciyaaryahanka xulka England, Declan Rice, ayaa labo gool ku dhaliyay laad xor ah, halka Mikel Merino uu dhaliyay goolka saddexaad, taasoo Gunners siisay fursad weyn kahor lugta labaad.

Inkastoo Arsenal ay haatan fursad heysato, Real Madrid waxaa lagu yaqaan inay mar walba la timaado mucjisooyin marka laga hadlayo tartanka Champions League.

Merson, oo hadal ka sheegay ciyaarta, ayaa yiri: “Si daacadnimo ah, dhammaan kulamadan wareega siddeeda ee Champions League waxaa ka muuqday goolal tayo sare leh iyo bandhigyo fiican.”

“Laakiin anigu ma rumaysni in ciyaarta Arsenal iyo Real Madrid ay dhamaatay. Tani waxay ka dhigaysaa kulan adag oo Gunners ay wajihi doonaan”

“Real Madrid afarta hore ee weerarkooda waxay noqon doonaan kuwo ka fiican lugta labaad, haddii ay gool hore helaan, cadaadis weyn ayaa iman doona.”

Merson ayaa sidoo kale magacaabay kooxda uu filayo inay gaarto finalka, isagoo sheegay in PSG ay u muuqato mid khatar ah.

“Aniga ahaan, PSG waxay u ciyaarayaan si kalsooni leh, waana kalsooni aan hore ugu arkin tartankaan.”

“Anigoo ixtiraam u haya Aston Villa, waxaan filayaa PSG inay u gudbi doonto finalka. Haddii ay Arsenal ama Real Madrid la kulmaan semi-finalka, wali waxaan rumeysnaan doonaa inay guuleysan karaan.”

Kahor kulanka Arsenal ay la ciyaari doonto Brentford horyaalka Premier League, Merson ayaa sheegay inuusan filaynin in tababaraha Arsenal, Mikel Arteta, uu isticmaalo dhammaan ciyaartoydiisa ugu fiican.

“Sidaas darteed, waxaan filayaa inuu qaar ka mid ah ciyaartoydiisa nasin doono kulanka Brentford,” ayuu yiri Merson.