Kooxda Arsenal  ayaa  xiiseyneysa ciyaarahanka garabka bidix ee Nico Williams, in kasta oo agaasimaha ciyaaraha ee Andrea Berta uu maskaxda ku hayo bartilmaameed kale, gaar ahaan iyadoo ay jirto caqabad ku saabsan suurtagalnimada in la soo iibsado garabka Athletic Club, TEAMtalk ayaa sidaas xaqiijiyay.

Williams, 22 jir, ayaa ka mid ah ciyaartoyda ugu muuqda LaLiga xilli ciyaareedkan wuxuuna sidoo kale ka caawiyay Athletic inay gaarto rubuca ugu dambeeya ee tartanka Europa League, isagoo dhowaan laba gool muhiim ah ka dhaliyay ciyaarta ka dhanka ah Roma.

Garabku waxa uu ka tirsan yahay Bilbao ilaa 2027, laakiin heshiiskiisu waxa uu ka koobanyahay qodob bixitaan. Warbixinnada ayaa ku kala duwan lacagtan, balse TEAMtalk waxay xaqiijisay in qodobka bixitaanku uu yahay €58m (£48.9m, $63.5m), Athletic-na waxay filayaan in lacagtaas la bixiyo hal mar haddii la kiciyo.

Mikel Arteta wuxuu doonayaa inuu ku daro xulkiisa garab bidix, inkastoo uu horey ugu jiro Leandro Trossard iyo Gabriel Martinelli booskaas.

Ilaha TEAMtalk ayaa sheegay in xiisaha Arsenal ee Williams uu yahay mid dhab ah. Si kastaba ha ahaatee, Gunners waxay sidoo kale ku hanweyn yihiin Matheus Cunha, kaas oo agaasimaha ciyaaraha ee soo galaya Berta uu aaminsan yahay in qaab ciyaareedkiisu uu si fiican ugu habboon yahay kooxda Wolves. Cunha waxa uu leeyahay qodob bixitaan oo gaadhaya £62.5m.

Nico Williams oo horeyba ugu mushaharo badan Athletic Club

Arsenal ma aha oo kaliya soo iibsadayaasha suurtagalka ah ee Williams.

Barcelona waxay u arkaan mid ah saxiix cusub oo riyo ah, sida ay xaqiijisay TEAMtalk. Qaar badan oo ka tirsan Barca, oo ay ku jiraan madaxweynaha Joan Laporta, ayaa doonaya inay dib u mideeyaan ciyaartoyda Spanish-ka ah Williams iyo Lamine Yamal.

Taas waxaa dheer in Raphinha uu muujinayo qaab ciyaareed heer sare ah, kaas oo weli uu yahay bartilmaameedka Saudi, Barcelona-na waxay muujisay xiiso muuqda oo ku aaddan Williams xagaaga hore.

Iyadoo ay xaaladda dhaqaale ee Barcelona adag tahay iyo baahidooda ah in ay iib geeyaan ciyaartoy ka hor inta aysan oggolaanin saxiixyada lacagaha badan, heshiis loogu talagalay Williams waa mid adag.

Bayern Munich sidoo kale waa taageerayaasha Williams waxayna suurtagal tahay inay tartanka galaan xagaaga soo socda ee saxiixa garabkiisa.

Sida Arsenal iyo Barcelona, Bayern waxay u arkaan qodobka bixitaanka ee €58m ee Williams inuu yahay qiime sax ah oo lacagta ah. Inta badan soo iibsadayaasha waxay isticmaalayaan tiradan sida heer-muuqaal ah balse waxay isku dayayaan inay helaan qaab-dhismeed ka duwan.

Waxaan sidoo kale xaqiijinaynaa in Chelsea ay horey u eegayeen Williams, balse iyadoo Geovany Quenda uu qorsheynayo inuu xagaaga soo galo, booska garabka bidix ayaa noqon doona mid aan mudnaan badan la siin xagaaga, iyadoo la filayo, sida caadiga ah, in Jadon Sancho uu si joogto ah ugu biiro kooxda.

Liverpool ayay u badan tahay in ay ugu yaraan xalliso xaalada heshiisyada Mohamed Salah iyo Virgil van Dijk bilaha soo socda, khabiirka Reds David Lynch ayaa sidaas yidhi.

Liverpool ayaa la daalaa dhacaysa in ay Heshiis Cusub ka saxiixato 3 ka mid ah xiddigeheeda.

Xiddigaha Salah, Van Dijk iyo Trent Alexander Arnold ayaa ku Jira bilihii ugu dambeeyay ee heshkooda.

David Lynch ayaa sheegay in ay Kooxdu wali ka shaqaynayso sidii ay Heshiis uga Saxiixan lahaayeen.

Xiddigaha Salah, Van Dijk iyo Trent Alexander Arnold Ayaa ka mid ah xiddigaha ugu fiican kooxda

Taageerayaasha Liverpool ayaa dhaleeceeyay Jordan Henderson kadib markii muuqaal uu kula galay Dan Burn xerada xulka England lagu baahiyay baraha bulshada.

Henderson ayaa caro ku beyray taageerayaasha Liverpool kadib markii muuqaal uu la galay Dan Burn oo ku sugan xerada tababarka xulka England uu soo baxay.

Burn ayaa markii ugu horreysay looga yeeray xulka England kaddib markii uu gool ka dhaliyay Liverpool kulankii kama dambaysta ee Carabao Cup, taasoo ay Newcastle United ku guuleysatay 2-1 Axaddii la soo dhaafay.

Waxa uu ka mid noqday xulka England ee isreeb-reebka Koobka Adduunka ee dhici doona dhammaadka bishan, halka Henderson oo ah kabtankii hore ee Liverpool uu isna ku jiro liiska ciyaartoyda uu xushay Thomas Tuchel tan iyo markii loo magacaabay tababaraha cusub.

Ciyaartoydu waxay isugu yimaadeen St. George’s Park Isniintii waxayna ku jireen tababar ay la qaadanayeen kooxda da’da ka hooseysa 21 jirada.

Markii la yimid, waxa shaashadda weyn laga daawaday guushii Newcastle ee Carabao Cup, iyadoo Burn uu daawanayay madaxii uu ku hoggaamiyay kooxdiisa guusha.

Difaaca dheer ayaa mar kale daawanayay finalka isaga oo la jooga Henderson, kaasoo lagu arkay isagoo qoslayo isla markaana la kaftamaya saaxiibkiisa caalamiga ah.

Is-dhaafsigaas dhexmaray Henderson iyo Burn ayaa ka careysiiyay taageerayaasha Liverpool, maadaama uu Henderson muddo dheer u soo ciyaaray Anfield.

Taageere isticmaala baraha bulshada ee X ayaa qoray: “Ma aha wax aad u weyn, laakiin kabtankii hore ee Liverpool iyo taageere Sunderland ah oo la kaftamaya ciyaaryahan Newcastle ah oo gool naga dhaliyay oo naga qaaday koobka waa wax lala yaabo haddii aad si qoto dheer u fikirto.”

Mid labaad ayaa qoray: “Wax xiiso leh miyaa, Hendo?”

Mid kale ayaa raaciyay: “Waa kabtankeenii hore,waxa sidan u dhaqmaya.”

Xagaagii 2023, wuxuu u wareegay Saudi Arabia ka hor inta uusan dib ugu soo laaban Yurub isagoo ku biiray Ajax.

Qaab ciyaareedkiisa wanaagsan ayaa dareenka soo jiitay, iyadoo Tuchel uu xushay 34-jirkan.

“Jordan waa ciyaaryahan marar badan guuleystay,” ayuu yiri Tuchel.

“Waa kabtanka Ajax. Waxa uu koox kasta u keenaa hogaamin, dabeecad, tamar iyo shakhsiyad.”

Manchester United ayaa diyaarisay liis ay ku jiraan afar weeraryahan oo ay doonayaan inay lasoo saxiixdaan suuqa kala iibsiga xagaaga, iyadoo wada hadallada horu dhaca ay durba bilowdeen.

United ayaa isku diyaarinaysa inay xoojiso weerarkeeda xilli ay dhibaato ka haysato gool dhalinta xilli ciyaareedkan, iyadoo Bruno Fernandes uu yahay gooldhaliyaha ugu sarreeya kooxda isagoo sideed jeer shabaqa soo taabtay horyaalka Premier League.

Weeraryahanada Rasmus Hojlund iyo Joshua Zirkzee oo kooxda ugu soo biiray lacag ka badan £100 milyan ayaa kaliya min afar gool ka dhaliyay horyaalka, taasoo ku qasabtay United inay raadsato weeraryahan cusub oo sumcad leh.

United waxay laba saxiix sameysay suuqii kala iibsiga ee Janaayo, iyagoo lasoo saxiixday daafacyada Patrick Dorgu iyo Ayden Heaven.

Laakiin, sida uu sheegay Florian Plettenberg oo ka tirsan Sky Sports Germany, United ayaa si “xooggan u baareysa suuqa” si ay u hesho weeraryahan cusub, iyada oo “wadahadallo horu dhac ah ay durba bilowdeen” ka hor inta uusan suuqu furmin.

Kooxda ayaa si xooggan loola xiriiriyay weeraryahanno badan, iyadoo magacyada Victor Osimhen iyo Viktor Gykoreres ay marar badan soo baxayaan.

Osimhen ayaa haatan amaah kula jooga Galatasaray oo uu uga yimid Napoli, kadib markii uu ku guuldareystay inuu u wareego Chelsea ama horyaalka Saudi Pro League xagaagii. Dhinaca kale, Gykoreres ayaa noqday mid ka mid ah weeraryahanada ugu wanaagsan caalamka isagoo Sporting CP ku dhaliyay 83 gool labadii xilli ciyaareed ee ugu dambeysay.

Waxaa la sheegay in labadaas weeraryahan ay sare kaga jiraan liiska United, balse sidoo kale ay indhaha ku hayaan xiddigaha Bundesliga ee Hugo Ekitike oo ka tirsan Eintracht Frankfurt iyo Benjamin Sesko oo u ciyaara RB Leipzig, kuwaasoo ah xulashooyin da’yar.

Dhinaca kale, weeraryahanka United ee Hojlund ayaa ugu dambeyn gool dhaliyay kadib markii uu gool la’aan ahaa 22 saacadood iyo 19 daqiiqo. Wuxuu goolkiisii ugu horreeyay u dhaliyay kooxda kulankii ay 3-0 kaga badiyeen Leicester, taasoo ahayd markii ugu horreysay ee uu shabaqa soo taabto 22 kulan iyo muddo saddex bilood ah.

Xiddiga Chelsea, Cole Palmer, ayaa seegi doona kulammada soo socda ee xulka qaranka England kadib dhaawac muruqa ah oo soo gaaray intii lagu jiray tababarka. Dhaawacan ayaa sidoo kale sababay in Palmer uusan ka qayb qaadan kulankii Chelsea ee ay guuldarrada 1-0 kala kulmeen Arsenal, taasoo keentay in kooxda ay hoos ugu dhacdo kaalinta afaraad ee horyaalka.

Tababaraha England, Thomas Tuchel, ayaa ku qasbanaaday inuu sameeyo isbeddelo degdeg ah kadib maqnaanshaha Palmer. Tuchel ayaa soo saaray saddex ciyaaryahan oo da’yar ah—Liam Delap, Adam Wharton, iyo Taylor Harwood-Bellis—si ay uga qayb qaataan tababarka kooxda koowaad ee England. Sidoo kale, Morgan Gibbs-White oo ka tirsan Nottingham Forest ayaa lagu daray liiska xulka si uu u buuxiyo booska bannaan ee Palmer.

Palmer, oo 22 jir ah, ayaa xilli ciyaareedkan u dhaliyay Chelsea 14 gool, isagoo noqday ciyaaryahan muhiim u ah kooxda. Si kastaba ha ahaatee, dhaawacan ayaa keenay in la sameeyo baaritaanno dheeraad ah si loo ogaado heerka dhaawaca iyo muddada uu garoomada ka maqnaan doono.

Maqnaanshaha Palmer ayaa sidoo kale saameyn ku yeelan kara qorshayaasha Chelsea ee kulammada soo socda, maadaama uu yahay mid ka mid ah ciyaartoyda ugu muhiimsan ee kooxda. Taageerayaasha Blues ayaa rajeynaya inuu si dhaqso leh uga soo kabsado dhaawacan oo uu dib ugu soo laabto garoomada.

Dhinaca kale, ciyaartoyda da’da yar ee fursadda helay ayaa haysta jaanis ay ku muujiyaan kartidooda, iyagoo rajeynaya inay soo jiitaan indhaha tababaraha xulka England iyo taageerayaasha.