Michail Antonio ma oga sida uu gaadhigiisa ugu dhacay geedka. Waxa kaliya ee uu ogyahay waa in uu dhacay.
“Boolisku way yimaadeen, markay i heleenna, waxaan ku jiray inta u dhaxaysa labada kursi. Xitaa kuma jirin kursiga darawalka,” ayuu xasuustaa.
“Waxay yidhaahdeen waxay u egtahay in aan isku dayayey in aan daaqadda ka baxo, laakiin lugtaydu si xun bay u jabtay, xanuunkuna wuxuu ii diiday in aan ka baxo.”
Shilku wuxuu dhaawac culus u geystay laacibka goolasha ugu badan ka dhaliyay West Ham ee Premier League, isagoo isbitaal ku jiray in ka badan saddex toddobaad lugta oo jaban darteed – taas oo bilow u ahayd safar adag oo uu ku soo kabsanayo.
Maanta, Antonio wuxuu ku adkaysanayaa in uu mar kale kubadda heer sare ah ciyaari doono, wuxuuna dareemayaa in la siiyay “fursad kale oo nololeed” ka dib markii uu aad ugu dhowaaday dhimashada.
Maxaa dhacay maalinta shilka?
Sabtidii, 7-dii Diseembar, waxay u bilaabatay sidii maalin caadi ah Antonio, iyadoo West Ham ay tababar u samaynaysay kulan horyaalka ah oo ay laba maalmood ka dib la ciyaari lahaayeen Wolves.
Wuxuu xasuustaa in cimiladu “dabeyl lahayd, roob lahayd, oo aad u xumayd” maalin ay Met Office soo saartay digniin ku saabsan Duufaanta Darragh.
Markii ay xaaskiisu weydiisay in uu alaab ka soo qaado gaarigooda kale, wuu caajisay, markaasuu Ferrari-giisa qaatay—gaarigaas oo uu shaki ka qabay.
“Dabada baabuurku way iga siibtay marar badan, mana dareemin badbaado,” ayuu yiri. “Waxaan haystay saddex toddobaad oo kaliya, haddana waxaan horey u qorsheynayay in aan iska celiyo.”
Go’aankaas ayaa wax walba beddelay, laakiin marka la weydiiyo waxa uu ka xasuusto shilka laftiisa—oo ka dhacay intii uu guriga ku sii socday—wuxuu ku jawaabay: “waxba.”
“Waxa yaab leh, maxaa yeelay intii ay waxani socdeen, waxaa la ii sheegay in aan toos ahaa oo aan la hadlay qof walba—booliska, dadkii goobta joogay, iyo qofkii i helay,” ayuu yidhi.
“Lugtaydu si xun bay u jabtay, way i soo saareen, waxayna dhinaca baabuurka iiga xireen qalab lagu toosiyo lafta.”
“Qof walba wuxuu u haystay in diyaaradda ambalaasta la igu qaaday, laakiin helikobtarku ma kici karin sababo la xiriira duufaanta, sidaas darteed ambalaas baa isbitaalka i geeyay.”
Saddex toddobaad ka hor, Antonio wuxuu booqday goobtii gaarigiisa la geeyay si uu u arko burburkiisa.
“Waxay dareen xun i gelisay. Waxay ii xaqiijisay sida aan dhimashada ugu dhowaaday. Waxaan arkay sawirro, laakiin marka aad dhab ahaan aragto, waxay 10 jeer ka xumaanaysaa sawirrada. Gaarigu burbur buu ku jirey. Aad bay ii dhibtay.”
—
Sidee u xun yahay dhaawaca Antonio?
Xusuustiisii ugu horreysay ee shilka kaddib waa mid gaaban oo Axaddii dhacday, markaasoo uu la hadlay saaxiibkiis qaaliga ah—wakiilkiisa Mike Appiason, oo si aad ah uga naxay.
“Waan burburiyey laftii femur-ka afar meelood oo kala duwan,” ayuu yidhi. “Waxaan maray hal qalliin yar (keyhole surgery). Waxay lugtayda geliyeen bir dheer oo ay afar boolal ku xireen si ay lafuhu isugu dhagaan.”
“Qalliinkii i sameeyay wuxuu yidhi saddex bilood ha saarin wax miisaan ah lugta, taasoo hadda laga joogo intii la ii sheegay, waxaadna arki kartaa in aan soconayo.”
“Waxa kale oo aan la tashanay khabiir kale oo yidhi waa in aan bilowdo in aan miisaan saaro lugta, laga bilaabo 10% ilaa 100% muddo saddex toddobaad gudahood ah.”
“Laakiin waxaan isticmaalayay ulaha caawiya socodka labo toddobaad oo dheeraad ah. Guud ahaan, waxay yiraahdeen in ay qaadan doonto lix ilaa 12 bilood in lugtaydu si buuxda u bogsato.”
Antonio wuxuu kaloo rabay in uu si cad u beeniyo wararka baraha bulshada lagu faafiyay ee sheegaya in uu cabbay ama daroogo isticmaalay.
Wuxuu sharxay: “Waxaan ka imid tababar, daroogona waligay ma qaadan. Waxaan horey u sheegay in aan cabbid jecelahay. Laakiin xilligan, ma jirin wax daroogo ah, ma jirin wax khamri ah. Boolisku way xaqiijiyeen in aysan waxaas jirin.”
Antonio wuxuu horey uga hadlay sidii uu u isticmaalay daawaynta maskaxda si uu uga gudbo geeridii aabbihiis iyo burburkii guurkiisii hore, taasoo sababtay in aanu si buuxda ugu dabaal degin guushii West Ham ee Conference League 2023.
Marka la weydiiyay sida uu uga falcelin lahaa shilkan haddii aanu horey u marin daawaynta, wuxuu yidhi: “Maba sii wadi lahayn ama waxaan isku dayi lahaa in aan iska qariyo dareenka oo aan cadhaysnaado ama dagaalamo.”
“Tan iyo shilka, waxaan noqday mid dareen badan leh marka loo eego noloshayda oo dhan, laakiin waxaan dareemayaa in ay i caawisay. Daawaynta maskaxda waa mid ka mid ah waxyaabihii ugu wanaagsanaa ee noloshayda ku dhacay.”
Taliyaha Ciidanka Booliiska Soomaaliyeed Sarreeye Guuto Asad Cismaan Cabdullaahi oo uu wehliyo Taliye ku xigeenka Sarreeye Guuto Cismaan Cabdullaahi Maxamed ayaa Magaalada Muqdisho ka sagootiyey Ciidamo Booliiska katirsan oo ku biiraya Ciidamada furimaha ku sugan ee dagaalka kula jira Khawaariijta.
