Ugu yaraan sagaal qof ayaa ku dhintay ku dhawaad 30 kalena waa ay ku dhaawacmeen ka dib markii kayd laga soo buuxiyay walxaha qarxa lagu qarxiyay saldhig boolis oo ku yaala Srinagar, oo ah magaalada ugu weyn Kashmir ee ay Hindiya maamusho.
Kaydka ayaa ku qarxay goor dambe oo habeenimadii Jimcaha saldhig boolis oo ku yaal aagga Nowgam, ee koonfurta Srinagar.
Mid ka mid ah ilo-wareedyo aan la magacaabin ayaa u sheegay wakaaladda wararka ee Reuters in ay socdaan dadaallo lagu aqoonsanayo iyada oo qaar ka mid ah maydadka ay “gubi ahaanba gubteen”.
“Xoogga qaraxu wuxuu ahaa in qaybo jirka ka mid ah laga soo saaray guryihii u dhowaa, meel 100-200 mitir u jirta saldhigga booliiska,” ayay tiri isha.
Inta badan dadka la dilay ayaa ahaa saraakiil booliis ah iyo saraakiil ka tirsan kooxda dambi baarista oo baarayay walxaha qarxa xilliga uu qaraxa dhacayay, sida ilo-wareedyo aan la magacaabin ay u sheegeen warbaahinta India ee NDTV, Labo sarkaal oo ka tirsan maamulka Srinagar ayaa sidoo kale ku dhintay qaraxa.
Iyadoo shan qof ay weli ku jiraan xaalad halis ah, dhimashadu waxay sii wadi kartaa inay korodho, sida ay sheegtay warbaahinta.
“Ma ahan weerar argagixisanimo. Booliisku waxay yiraahdaan waa dhacdo aad looga xumaado,” Tifaftiraha sare ee NDTV Aditya Raj Kaul ayaa ku yiri qoraal uu soo dhigay baraha bulshada.
“Qaraxu wuxuu dhacay markii koox cilmi-baadhiseed iyo booliisku ay hubinayeen walxaha qarxa ee saldhigga booliiska ku kaydsan,” ayuu yidhi.
Qaraxan weyn ayaa yimid maalmo kadib markii Isniintii uu qarax gaari lagu hoobtay uu ka dhacay magaalada New Delhi, kaasoo ay ku dhinteen ugu yaraan 12 qof meel u dhow daarta cas ee taariikhiga ah ee magaalada, kaasoo ay saraakiishu ku tilmaameen dhacdo “argagixiso”.
Qaraxan oo ka dhacay caasimadda Hindiya ayaa dhacay saacado un kaddib markii ciidamada booliska ay xireen dhowr qof oo ay ka soo qabteen walxaha qarxa iyo sidoo kale qoryo fudud.
Booliska ayaa sheegay in tuhmanayaasha lala xiriirinayo Jaish-e-Muhammad (JeM), oo ah koox Pakistan fadhigeedu yahay oo doonaysa in ay soo afjarto xukunka Hindiya ee Kashmir, iyo Ansar Ghazwat-ul-Hind, oo ka soo jeeda Kashmir oo xiriir la leh JeM.
Booliska Kashmiir ee ay Hindiya maamusho ayaa sidoo kale xiray in ka badan 650 qof, taasoo qayb ka ah baaritaankooda ka dib qaraxii baabuur ee New Delhi.
Sida ay wararku sheegayaan, saldhigga booliiska Nowgam, oo ah halkii uu qaraxu ka dhacay Jimcihii, ayaa horseeday baaritaan lagu sameeyay boodhadh ay ku dhejiyeen agagaarka aagga JeM, oo ay uga digayaan inay qaadaan weeraro ka dhan ah ciidamada ammaanka iyo “dibadda”.
Booliisku waxay sheegeen in baaritaankooda boodhadhka ay kashifeen “nidaamka deegaanka argaggixisannimo ee cad-cad, oo ay ku lug leeyihiin xirfadlayaal xagjir ah iyo arday xiriir la leh gacan-ku-hayayaal ajnabi ah, oo ka shaqeeya Pakistan iyo dalal kale”.
Booliska ayaa sidoo kale soo helay ku dhawaad 3,000kg (3 tan) oo walxaha qarxa ah, iyaga oo sheegay in kooxda hubaysan ay kaydinayeen ku filan in ay weerar culus ka geystaan India.
Kashmir ayaa u kala qaybsantay Hindiya iyo Pakistan tan iyo markii ay xornimada ka qaateen gumaystihii Ingiriiska sannadkii 1947-kii, waxayna labaduba sheeganayaan dhulka Himalaya.
Labadan dal ayaa saddex dagaal ku dhex maray Kashmir tan iyo markii ay kala qaybsameen sannadkii 1947-kii, waxaana weli taagan xiisad u dhexeysa New Delhi iyo Islamabad oo ku saabsan xaaladda dhulkaas.
SOURCE ALJAZEERA
XAFIISKA WARARKA SIYAASADA
DAYNIILE.COM
