XIGASHO LAACIB.NET
Real Madrid ayaa si rasmi ah ugu dhawaaqday in Álvaro Arbeloa uu noqonayo tababaraha cusub ee kooxda koowaad, isagoo baddalaya Xabi Alonso oo xilka laga qaaday caawa oo Isniin ah.
Arbeloa, oo ah mid ka mid ah halyeeyada kooxda, ayaa laga soo dallacsiiyay kooxda labaad ee Castilla, halkaas oo uu tababare ka ahaa tan iyo bishii Juun 2025.
Magacaabistiisa ayaa loo arkaa tallaabo ay kooxdu ku doonayso inay ku xoojiso aqoonsiga iyo qiyamka “Madridismo”, maadaama uu Arbeloa ku soo dhex qaatay dhammaan xirfadiisa tababarenimo akadeemiyada kooxda (La Fábrica).
Arbeloa wuxuu muujiyay karti weyn intii uu hoggaaminayay kooxaha da’yarta. Xilli-ciyaareedkii 2022-2023, wuxuu koox da’yarta u horseeday Treble taariikhi ah (Horyaalka, Copa del Rey, iyo Champions Cup). Sidoo kale, wuxuu horyaallada la qaaday kooxaha Infantil A iyo Cadete A intii u dhaxeysay 2020 ilaa 2022.
Wuxuu qayb ka ahaa facii dahabiga ahaa ee Spain ee ku guuleystay Koobkii Adduunka 2010 iyo labo koob oo qaramada Yurub ah (2008 & 2012), isagoo u saftay xulka qaranka 56 kulan.
Álvaro Arbeloa ayaa hadda wajahaya caqabadda ugu weyn ee xirfaddiisa, isagoo mas’uul ka noqon doona inuu kooxda dib ugu soo celiyo tartanka horyaalka La Liga, halkaas oo ay 4 dhibcood ka dambeeyaan Barcelona, iyo inuu u horseedo guul tartanka Champions League.
