Rasmi: Tababaraha Barcelona oo seegaya kulanka weyn ee El-Clásico; waa tan sababta rasmiga ah

XIGASHO LAACIB.NETKooxda Barcelona ayaa u safri doonta kulanka El Clásico ee Axadda soo socota ay la ciyaari doonaan Real Madrid iyada oo aan tababareheeda Hansi Flick garoonka joogin, kadib markii la saaray ciyaartii ay 2-1 kaga adkaadeen Girona, taasoo ka dhigan inuu seegi doono kulanka ka dhici doona garoonka Santiago Bernabéu.

Guushaas ayaa ahayd mid xiiso leh, iyadoo daafaca reer Uruguay Ronald Araújo uu goolka guusha dhaliyay daqiiqaddii 90+3, kaddib markii loo beddelay weeraryahan dhamaadkii ciyaarta si uu u abuuro fursad weerar. Goolkiisa ayaa Barcelona ku hogaamiyay saddex dhibcood oo muhiim ah oo ay ka heleen ciyaar adag.

Inkasta oo ay dhaawacyo kaga maqan yihiin ciyaartoy muhiim ah sida Ferran Torres, Robert Lewandowski, Dani Olmo iyo Raphinha, haddana Barcelona ayaa muujisay adkaysi iyo xeelad ciyaareed oo dabacsan taas oo u suurto gelisay inay guul ka gaaraan deriskooda reer Catalonia.

Dhanka kale, Real Madrid ayaa kulanka soo geli doonta iyadoo qaab ciyaareed fiican ku jirta, oo uu hogaaminayo tababare Xabi Alonso, balse waxay la ildaran yihiin dhaawacyo ay ka mid yihiin Dani Carvajal, Trent Alexander-Arnold iyo suurtagalnimada maqnaanshaha Dean Huijsen. Si kastaba, Kylian Mbappé ayaa la filayaa inuu diyaar u noqdo kulanka kadib dhaawac fudud.

XIGASHO LAACIB.NET