XIGASHO LAACIB.NET
Dani Carvajal ayaa hadda ku jira marxaladdii ugu dambaysay ee kasoo kabsashada dhaawac jilibka midig ah, isaga oo dhowaan ku soo laabtay tababarka kooxda Real Madrid ka dib muddo 70 maalmood ah oo uu garoomada ka maqnaa.
Kabtanka Real Madrid ayaa u muuqda mid hiigsanaya inuu qayb ka noqdo safka kooxda u safraysa dalka Sacuudi Carabiya bishan Jannaayo 2026, si uu uga qayb galo tartanka Spanish Super Cup.
In kasta oo uusan qabsan taariikh go’an oo uu garoomada si rasmi ah ugu soo laabanayo, haddana waxaa jira rejo weyn oo laga qabo inuu soo muuqdo kulanka nus-dhamaadka Super Cup-ka ee ay Real Madrid la yeelan doonto kooxda Atlético Madrid maalinta Khamiista ah ee January 8, 2026.
Tababare Xabi Alonso ayaa u arka soo laabashada Carvajal mid muhiim u ah xasilloonida daafaca midig, gaar ahaan xilli uu dhaawac ku maqan yahay Trent Alexander-Arnold.
Mustaqbalka Carvajal ee Real Madrid ayaa ku xiran qaab ciyaareedkiisa inta ka dhiman xilli-ciyaareedkan. Qandaraaskiisa hadda wuxuu ku eg yahay June 30, 2026, maadaama kooxdu ay u kordhisay hal sano oo dheeri ah markii uu dhaawaca ACL-ka la kulmay dabayaaqadii 2024.
Maamulka kooxda ayaa ballan-qaaday inay u fidin doonaan qandaraas kordhin kale haddii uu muujiyo in jirkiisu u oggolaanayo inuu weli heerka sare ee kubadda ku tartamo, taas oo sidoo kale u furi karta albaabka uu kaga qayb geli lahaa Koobka Adduunka ee 2026.
Carvajal wuxuu si cad u sheegay inuusan tixgelinayn dalabyada dhaqaale ee uga imaanaya dibadda, sida Sacuudiga ama Qatar, isagoo ku adkaystay in Real Madrid ay tahay hoygiisa uuna doonayo inuu halkaas ku soo gabagabeeyo xirfaddiisa inta uu yahay ciyaaryahan saameyn leh.
Safarkiisii dhowaan ee dalka Qatar wuxuu ahaa mid qoys oo uu ku booqanayay saaxiibkiis Joselu, mana jirin wax xiriir ah oo uu la yeeshay koox halkaas ka dhisan.
XIGASHO LAACIB.NET
