MUQDISHO (DAYNIILE.COM)-Ciyaartoyda Kubada Cagta ee Degmooyinka Howl-wadaag iyo Warsheekh ayaa isugu soo haray Fiinaalka ciyaaraha Degmooyinka Gobolka Banaadir iyo Warsheekh kadib kulamadii seme-fiinaalaha oo shalay iyo maanta ay ku soo kala baxeen labadaani Degmo.
Shalay Kooxda Howl-wadaag waxay 1-0 uga soo badisay Dharkeenleey kulan adag oo kumanaan dad ah ka soo qeybgaleen ,sidoo kale maanta kulan kale oo isna sidaas oo kale u adkaa loona soo camiray ayaa dhexmaray Kaaraan iyo Warsheekh kaasoo ku dhamaaday 0-0 balse rigoorooyin la dhigay waxaa 6-5 ku adkaaday Warsheekh oo sidaas ugu soo gudubtay kama danbeysta tartanka.
Si kastaba kulanka ugu adag tartanka oo ah midka ugu danbeeya wuxuu koobka dhex yaalaa kooxaha Warsheekh iyo Howlwadaag oo Muqdisho iyo shabeelaha dhexe kala matalaya,waxana la qiyaasayaa inuu noqon doono kulanka daawadayaasha ugu badan ay ka soo qeybgalaan sidoo kalana ciyaarta ugu adag ay noqoto Inshaa Allah.
Macalinka Degmada Howlwadaag Ninka lagu magacaabo Xamaam ayaa noqday macalinka ugu hadal heynta badan dhamaan macalimiinta kooxaha oo dhan,ninkaan ayaa la baxay magaca Kaaba laadirka ciyaarta wuxuuna qaataa kulan kasta jaakad weyn sida macalimiinta dunida gaar ahaan kuwa reer Yurub.
Macalin Xamaam wuxuu soo jiitay quluubta inta badan daawadayaasha ciyaaraha degmooyinka waana ninka ugu kaftanka badan dhamaan macalimiinta taasoo macaani gaar ah u sii yeeshay garoonka iyo guud ahaan tartanka waliba kulamada koxdiisu ciyaareyso.
XAFIISKA WARARKA SIYAASADA
DAYNIILE.COM
