Jowhar, 6-Oktoobar-2025:
Madaxweynaha Dowladda Hirshabeelle Mudane Cali Cabdullaahi Xuseen (Cali Guudlaawe), Madaxweyne ku-xigeenka Mudane Yuusuf Axmed Hagar (Dabageed), Ra’iisulwasaarihii hore ee Soomaaliya Mudane Cali Maxamed Geeddi, Mudanayaasha labada aqal ee Baarlamaanka JFS, Xildhibaanada iyo Wasiirrada Dowladda Hirshabeelle, Guddoomiyeyaasha Goballada Shabeellada Dhexe iyo Hiiraan, Taliyaha Ciidanka Booliska Hirshabeelle, Afhayeenka Wasaaradda Difaaca Soomaaliya, Duqa magaalada Jowhar, fannaaniin, bahda warfaafinta iyo marti sharaf ayaa ka qeybgalay.
Dhammaan dhinacyadii goobta ka hadlay ayaa madaxda Dowladda Hirshabeelle ku boogaadiyey kaalintooda iyo halka maanta ay joogto Hirshabeelle.
Ra’iisulwasaarihii hore Soomaaliya Mudane Cali Maxamed Geeddi oo ka hadlayey ogaalkiisa magaalada Jowhar waqtigii ay Dowladdiisa ku shaqeyneysay iyo maanta ayaa tilmaamay inuu indhihiisa kusoo arkay isbeddel dhinacyo badan.
Madaxweynaha Dowladda Hirshabeelle oo gabogabada haddal kooban ka jeediyey goobta ayaa yiri: “Dhammaadka sannadka haddii uu Alle idmo waxaa soo idlaan doono mashaariicda lagu hirgelinayo xarumada Dowladda oo iminka gabogabo ah.”
Sidoo kale Madaxweynaha ayaa uga mahadceliyey martida u timid magaalada Jowhar ka qeybgalka munaasabadda aas-aaska Dowladda Hirshabeelle.
Bulshada Dowladda Hirshabeelle ayaa guud ahaan meel walba ay joogaan bisha Oktoobar waxa ay dunida uga dabaal-deggaan curashada Dowladda Hirshabeelle.
DHAMMAAD
Wixii faah-faahin ah kala xiriir
Agaasimaha Warfaafinta iyo Xiriirka Bulshada Madaxtooyadda
