Solskjær oo ku dhow inuu noqdo tababaraha ku meel gaarka ah ee United

Ole Gunnar Solskjær ayaa qarka u saaran inuu markii labaad dib ugu soo laabto kursiga tababaranimo ee Manchester United, isagoo wadahadallo horumar leh kula jira maamulka kooxda si uu u noqdo tababaraha kumeel-gaarka ah ilaa dhammaadka xilli-ciyaareedkan.

Soo laabashada Solskjær waxaa si weyn u taageeraya xiddigaha muhiimka ah ee kooxda kowaad sida kabtan Bruno Fernandes iyo Harry Maguire, kuwaas oo horay ula soo shaqeeyay. Sidoo kale, halyeeyada kooxda ee kala ah Rio Ferdinand iyo Gary Neville ayaa aaminsan in Ole uu yahay qofka ugu habboon ee xilligan dejin kara xaaladda qolka labiska ee qasan.

Solskjær qudhiisa ayaa rajeynaya in haddii uu guulo gaaro lixda bilood ee soo socota, uu heli karo fursad uu ku noqdo tababaraha joogtada ah ee kooxda.

Ceyrintii Ruben Amorim ayaa timid ka dib markii uu diiwaangeliyay rikoorkii ugu xumaa ee tababare soo mara United, isagoo guuleystay kaliya 32% kulammadii uu hoggaamiyay. Waxaa intaas u dheeraa khilaaf soo kala dhex galay isaga iyo agaasimaha ciyaaraha Jason Wilcox, iyo isagoo diiday inuu ka tanaasulo nidaamka saddexda daafac oo ay ciyaartoydu ku dhibtoodeen.