XIGASHO LAACIB.NET
Halyeeyga Liverpool Steven Gerrard ayaa aaminsan in tababaraha Liverpool, Arne Slot, uu wajahayo cadaadis weyn oo dibadda ah, gaar ahaan mid uga imanaya taageerayaasha iyo warbaahinta, xilli ay kooxdu ku jirto hoos-u-dhac xilli ciyaareedka 2025/26.
Si kastaba ha ahaatee, Gerrard wuxuu adkeeyay in milkiilayaasha kooxda iyo mas’uuliyiinta muhiimka ah ee Liverpool ay si buuxda u garab taagan yihiin tababaraha reer Holland.
Liverpool ayaa wajahday natiijooyin aad u liita tan iyo bilowgii sanadka, iyagoo ku guuldarreystay inay hal kulan oo Premier League ah badiyaan sannadka 2026.
Guuldarradii ugu dambeysay ee 3–2 ahayd ee ay kala kulmeen Bournemouth ayaa ka saartay boosaska u soo bixitaanka Champions League, taasoo sii xoojisay caro iyo niyad-jab ay muujiyeen taageerayaasha. Qaar ka mid ah taageerayaasha ayaa xitaa ku baaqay in Gerrard dib loogu soo celiyo si ku-meel-gaar ah, balse halyeeyga Reds wuxuu sheegay in sawirka dhabta ah ee Anfield uu ka duwan yahay midka dibadda laga arkayo.
Isagoo ka hadlayay TNT Sports intii lagu guda jiray tabinta kulankii Champions League ee Liverpool ay la ciyaartay Qarabag, Gerrard ayaa si toos ah uga hadlay xaaladda.
“Cadaadiskiisu inta badan waa mid dibadda ah, warbaahinta iyo taageerayaasha aan ku qanacsanayn qaab ciyaareedka Liverpool ee horyaalka. Gudaha kooxda se way ka duwan tahay… Anigoo wax yar ka yaqaanna Richard Hughes, isla markaana si wanaagsan u garanaya Michael Edwards, waxaan aaminsanahay inay doonayaan inay adkaystaan oo ay garab istaagaan tababaraha. Taasi waa waxa Liverpool taariikh ahaan lagu yaqaanay.”
XIGASHO LAACIB.NET
