Taliyaha cusub ee Ciidanka Asluubta Soomaaliyeed, Sarreeye Gaas Maxamed Sheekh Xasan Xaamud, ayaa maanta si rasmi ah xilka ula wareegay, kaddib markii dhawaan loo magacaabay hoggaanka ciidankaasi.
Munaasabadda xil wareejinta ayaa ka dhacday xarunta Taliska Ciidanka Asluubta, gaar ahaan dhismaha ku yaalla dhinaca Xabsiga Dhexe, waxaana xilka ku wareejiyay Taliye Ku-xigeenka Ciidanka Asluubta Soomaaliyeed, General Cilmi Waasuge Colow.
Xafladda ayaa waxaa ka qeyb galay xubno kala duwan oo isugu jira saraakiil ka tirsan Ciidamada Qalabka Sida, xildhibaanno ka tirsan labada gole ee Baarlamaanka, xubno ka socday Golaha Wasiirrada oo uu ku jiray Wasiiru Dowlaha Wasaaradda Cadaaladda, iyo marti sharaf kale oo lagu casuumay munaasabadda.
Kadib marka uu soo dhammaaday wareejinta xilalka, waxaa ugu horreyn halkaas ka hadlay xildhibaanno iyo saraakiil ay ka mid ahaayeen Xildhibaan Black iyo General Dhagacelin, kuwaas oo si diirran u soo dhaweeyay taliyaha cusub, isla markaana uga mahadceliyay taliyihii hore dadaalka iyo shaqadii uu qaranka u soo qabtay muddadii uu xilka hayay.
Taliye Ku-xigeenka Ciidanka Asluubta Soomaaliyeed, General Cilmi Waasuge Colow, oo ka mid ahaa masuuliyiintii madasha ka hadashay, ayaa sheegay inuu si rasmi ah maanta xilka ugu wareejiyay Sarreeye Gaas Maxamed Sheekh Xasan Xaamud, isagoo u rajeeyay inuu si hufan u guto waajibaadka loo igmaday.
Dhankiisa, Taliyaha cusub ee Ciidanka Asluubta Soomaaliyeed, Sarreeye Gaas Maxamed Sheekh Xasan Xaamud, ayaa khudbad dhinacyo badan taabaneysay ka jeediyay munaasabadda, isagoo carrabka ku adkeeyay in Ciidanka Asluubta Soomaaliyeed ay u baahan yihiin dib-u-habeyn ballaaran si loo xoojiyo hannaanka cadaaladda iyo maamulka xabsiyada dalka.
Ugu dambeyn, Taliyaha cusub ayaa ballan qaaday inuu xoogga saari doono horumarinta ciidanka, kor u qaadidda tayada shaqo, iyo ilaalinta xuquuqda maxaabiista, si waafaqsan sharciga iyo dastuurka dalka.
