Taliyaha Macawisleyda Deegaanka Nuur Dugle ee Gobolka Shabeelaha dhexe Abshir Quraanle ayaa qirey in Alshabaab qabsadeen qeybo ka mid ah Deegaanka maalinimadii shalay.
Dagaal culus oo shalay dhacay ayay kula wareegeen Alshsbaab Ceelka Cali Salaad ee Deegaanka Nuur Dugle oo ah halka ugu muhiimsan madaama uu yahay ceelka kaliya ee dadka deegaanku cabaan islamarkaana xoolaha ka waraabiyaan.
Taliyaha Macawisleyda Abshir Quraanle wuxuu sheegay in ciidamo gurmad ah oo dhanka Dowlada ka socda inay soo gaareen deegaanka ayna hada isu muuqdaan iyaga iyo Alshabaab balse wali aysan talaabo qaadin.
“Alshabaabkii shalay qabsaday ayaa wali heysta ceelka Cali Salaad ee Deegaanka Nuur Dugle,xalayna dhulka iyo cirka waa laga weeraray walina saaka iyagaa heysta”ayuu yiri Taliyaha Macawisleyda Deegaanka Nuur Dugle.
Taliyaha wuxuu ka gaabsaday inuu wax ka sheego khasaaraha nafeed ee duqeymaha ka soo gaaray kooxda Alshabaab madaama sida isaguba cadeeyay aysan ogaan karin.
XAFIISKA WARARKA SIYAASADA
DAYNIILE.COM
