XIGASHO LAACIB.NET
Tartanka loogu jiro kabta dahabka ah ee Champions League-ga xilli ciyaareedkan ayaa sii kululaaday ka dib markii la ciyaaray kulamadii hore ee wareegga semi-finalka, kuwaas oo isbeddel weyn ku sameeyay kala sarreynta gooldhalinta qaaradda Yurub.
Xiddigo dhowr ah ayaa hadda si adag ugu loolamaya cidda noqon doonta boqorka gooldhalinta sanadkan 2026.
Liiska gooldhalinta waxaa weli hoggaaminaya xiddigo magac leh, balse goolkii uu Julian Alvarez rigoorada uga dhaliyay kooxda Arsenal ayaa kor u soo qaaday goolashiisa, isagoo hadda ku jira boosaska ugu sarreeya.
Sidoo kale, Viktor Gyökeres oo gool u dhaliyay Arsenal isla kulankaas ayaa isna sii adkeeyay booskiisa gooldhalinta. Wuxuu weeraryahankan kamid yahay xiddigaha loogu cabsida badan yahay tartanka. Xiddigaha sida Kylian Mbappé iyo Erling Haaland ayaa iyaguna weli ku jira loolanka, inkasta oo saameynta ciyaaraha semi-finalka ay u muuqato mid fursad siinaysa xiddigo cusub.
Iyadoo loolanku yahay mid aad isugu dhow, gool kasta oo la dhaliyo kulamada soo socda wuxuu miisaan weyn u yeelan doonaa kala sarreynta kama dambaysta ah, taas oo ka dhigaysa Champions League-ga xilli ciyaareedkan mid ka mid ah kuwii ugu xiisaha badnaa dhinaca tartanka goolasha.
XIGASHO LAACIB.NET
