XIGASHO LAACIB.NET
Thomas Partey, oo horey uga tirsanaa kooxda Arsenal, ayaa damaanad lagu siidaayay ka dib markii uu ka soo muuqday maxkamadda Westminster Magistrates’ Court isagoo wajahaya eedeymo culus oo ah kufsi iyo xadgudub galmo.
Partey, oo 32 jir ah, ayaa lagu soo oogay shan dacwadood oo kufsi ah iyo hal xadgudub galmo, kuwaas oo la sheegay inay la xiriiraan saddex haween ah iyo inay dhaceen intii u dhaxaysay 2021–2022, sida laga soo xigtay booliska Metropolitanka.
Wuxuu Sheegay Inuu Dacwadaha Dhammaantood Diidan Yahay
Garyaqaankiisa Jenny Wiltshire ayaa horey u sheegtay in Partey uu “soo dhawaynayo fursadda uu ku nadiifin karo magaciisa” — sida ay baahisay BBC Sport.
Xaaladda Dacwadda iyo Shuruudaha Damaanadiisa
Garsoore Paul Goldspring, oo ka tirsan maxkamadda, ayaa sheegay:
“Waan fahamsan-nahay in aanu hadda shaqo ku lahayn UK oo uu ka ciyaarayo Spain.”
Shuruudaha damaanadda Partey waxaa ka mid ah:
- In uusan la xiriiri karin midkoodna saddexda haween ee dacwadda ku lugta leh
- Inuu booliska ku wargeliyo haddii uu bedelo ciwaankiisa degganaansho
- Inuu sidoo kale ku wargeliyo safar kasta oo uu ugu baxayo dalka dibaddiisa
Partey wuxuu markale maxkamad hortegi doonaa 2-da Sebtembar, markaas oo uu ka soo muuqan doono maxkamadda Old Bailey, oo ah mid ka mid ah maxkamadaha ugu sarreeya UK.
