XIGASHO LAACIB.NET
Tijjani Reijnders ayaa ammaanay ciyaartoyda kooxda Manchester City, isagoo sheegay inay ka caawiyeen inuu si fudud ula qabsado horyaalka Premier League ka dib markii uu xagaagii hore kaga soo biiray AC Milan.
Xiddigan khadka dhexe ee u dhashay dalka Holland, oo xilli ciyaareedkan ka qayb qaatay 32 kulan isagoo dhaliyay lix gool, todobo kalena caawiyay, ayaa tilmaamay in taageerada uu ka helay saaxiibadiisa kooxda ay ka caawisay inuu si degdeg ah u caga dhigto.
Reijnders ayaa yiri: “Bilowgiiba wax walba waxay ahaayeen kuwo aad u wanaagsan. Si toos ah ayay ii caawiyeen, waxay iga dhigeen inaan dareemo sidii qof gurigiisii jooga si degdeg ah, waxayna hubiyeen inaan sida ugu dhakhsaha badan ula qabsado kooxda.”
Reijnders ayaa sidoo kale iftiimiyay farqiga u dhexeeya horyaalka Premier League iyo horyaallada Serie A iyo Eredivisie, isagoo yiri: “Awoodda jidheed iyo xawaaraha ciyaarta had iyo jeer waa boqolkiiba boqol. Marna nasiino ma helaysid inta ay ciyaartu socoto. Waa inaad diyaar ahaataa mar kasta oo aad kubadda hesho.”
XIGASHO LAACIB.NET
