XIGASHO LAACIB.NET
Alexander Isak ayaa si joogto ah loola xiriirinayay inuu u wareego Anfield xagaagan oo dhan, balse milkiilayaasha Sucuudiga ee Newcastle ayaa la sheegay inay si cad u sheegeen inuusan meelna aadayn.
Wararka ayaa sheegaya in Isak loo sheegay inuusan helayn oggolaansho uu kaga tago Newcastle United xagaagan isla markaana “aan loo oggolaan doonin inuu ku biiro Liverpool” taasoo ka cadheysiisay.
Eddie Howe ayaa Jimcihii qirtay, kadib markii mar kale Isak uusan ka qayb qaadan ciyaarta saaxiibtinimo ee Espanyol, inuusan filayn in ciyaaryahanka uu diyaar u noqdo kulanka Aston Villa toddobaadka dambe marka Premier League dib u billowdo.
Dhanka kale, wargeyska The Telegraph ayaa sheegaya in milkiilayaasha Sucuudiga ee Newcastle ay qaateen mowqif adag oo ka dhan ah go’aanka 25-jirka ah ee doonaya inuu isku dayo inuu ku biiro Liverpool.
Warbixintu waxay intaas ku dartay in Isak uu “diiday inuu si deggan u aqbalo go’aanka”, taasoo keentay “khilaaf iyo xiisad”.
Waxaa sidoo kale la sheegay inay “aad u adag tahay” in Newcastle ay fasaxdo xiddigeeda xitaa haddii ay hesho beddel suuqa kala iibsiga, iyadoo xaaladduna ay imtixaan ku tahay dulqaadka tababare Howe.
Wararka ayaa imanaya xilli Liverpool ay isu diyaarinayso inay macsalaameyso Darwin Núñez, kaas oo ku biiraya Al-Hilal kadib markii labada koox heshiis gaareen Khamiistii.
Iyadoo sidoo kale Federico Chiesa la filayo inuu tago, Liverpool waxaa u haraya keliya saddex weeraryahan — Mohamed Salah, Hugo Ekitike iyo Cody Gakpo — hase yeeshee Rio Ngumoha ayaa door weyn ka ciyaari doona kooxda xilli ciyaareedkan.
XIGASHO LAACIB.NET
