Kooxo hubeysan ayaa xalay waxay dileen qof shacaba halka ay 4 kale dhawaceen markii ay jidka u galeen gaari ka baxay Magalada Cabud-waaq kuna sii jeeday Magaalada Dhabad.
Wararka waxay intaasi ku darayaan in saaka uu xiisad dagaal ka taagan yahay deegaanada u dhexeeya Degmooyinka Cadaado iyo Dhabad taasoo ka dhalatay dilkaasi oo lagu macneeyay aanooyin qabiil.
laba maleeshiyo beeleed oo ka soo kala jeeda Dhabad iyo Cadaado ayaa xiisadaan dagaal u dhexeysaa, bilahaan danbe waxaa ku soo badanaya deegaanada Galmudug dagaal beeleedyada xili maamulka Goboleedka Galmudug uusan wali xal rasmi ah u keenin arimahaan sida inay ciidamo kala dhex dhigaan sidoo kale u sameeyaan maxkamado shaqeeya.
Dhowr qofood ayaa maalmihii ugu danbeeyay aanooyin qabiil loogu dilay isla gobolka Galgaduud iyadoo aaney jirin dib u heshiisiin dhab ah oo beelaha loo sameeyay si looga hor tago isku dhacyada joogtada noqday.
XAFIISKA WARARKA
DAYNIIILE.COM