MUQDISHO (DAYNIILE.COM)-Waxaa xaalad khatar ah laga soo warinayaa Xeebaha Dalka gaar ahaan Xeebta Liido ee Magaalada Muqdisho halkaasoo kumanaan dad ah u dalxiis iyo dabaal tagaan maalmaha fasaxa sida Khamiista iyo Jimcaha.
Shalay oo jimco ahayd waxaa laga diiwaan geliyay xeebta Liido inay baddu qaaday caruur ka badan 6 kuwaasoo qaarna meydadkooda badu isla shalay soo tuftay halka kuwa kalana nolol iyo geeri lagu la’yahay.
Dadkii shalay xeebaha joogay qaarkood waxay cadeeyeen in baddu lahayd jiidtaan dadka ay dhanka moolka gudaha u jiidanaysay , sidoo kale waxay sheegeen in shalay dadka badu qaaday caruur u badnaayeen.
Sidoo kale waxa laga soo warinayaa xeebata in shalay dadka qaar laga bad baadiyay iyadoo biyuhu sii wataan oo dad waa weyn ay ku jireen.
Xaaladaani oo badu mararka qaar gasho waxa ugu badan ee lagu sirmo waxaa ka mida in baddu degan tahay una egtahay sidii inay biyuhu aad u xasilan yihiin oo kale balse markaad gudaha u gasho ayaad ogaan kartaa in biyuhu kaliya kuu jiidanayaan dhanka moolka.
Marka ay xaalada nuucaas tahayna waa halis loo baahan yahay in Hay’adaha Dowladu dadka ka wacyigeliyaan ama u diidaan waqtiyadaasba in badda lagu dabaasho gaar ahaan caruur aan lala socon.
XAFIISKA WARARKA SIYAASADA
DAYNIILE.COM
