GAALKACYO (DAYNIILE.COM)-Wararka ka imaanaya Magaalada Gaalkacyo ee xarunta Gobolka Mudug qeybta Puntland ayaa sheegaya in xiisadii u dhexeysay Maamulkaasi iyo Taliska ciidamada PSF inay gaartay meeshii ugu sareeysay.
Maalmihii ugu dambeeyay Guddoomiyaha Gobolka Mudug ee Puntland, Faysal Shiikh Cali (Jifo-jabsade) wuxuu ku eedeynayay ciidamada PSF inay u shaqeeyaan Dowlada Faderaalka Somalia gaar ahaan Madaxweyne Xassn laakiin maanta Gudoomiyuhu xaalada meel ka sii sareysa ayuu gaarsiiyay.
Gudoomiye Faysal Shiikh Cali (Jifo-jabsade) wuxuu ku dhawaaqay in PSF xiriri la leeyihiin Alshabaab islamarkaana ayba iyaga ka dambeeyeen wixii hore madax jabis uga dhacay Magaalada Gaalkacyo.
“ciidanka PSF waxay qeyb ka ahaayeen dilalkii qorshaysnaa iyo madax-jebiskii laga raystay ee ka dhici jiray Gaalkacyo”ayuu yiri Jifo-jabsade oo maanta hadal ka jeediyay magaalada Gaalkacyo.
Gudoomiyaha wuxuu intaasi ku daray in maalintii Ciidanka PSF shaqada laga joojiyay ilaa iyo hada aaney Gaalkacyo ka dhicin wax dil ah taasoo ah eedeyn kale oo culeyskeeda wadata.
Sidoo kale wuxuu ku eedeeyay ciidamada PSF inaan taariikhda lagu heyn qof ay alshabaabnimo iyo madax jabis usoo qabteen taas badalkeeda marka ciidamada kale ay soo qabtaan ayuu sheegay inay ka daba iman jireen.
Si kastaba Gudoomiyaha Gobolka Mudug Faysal Jifo-Jabsade ma shaacin wax cadeyn ah oo ku saabsan eedeynta culus uu u jeediyay ciidamada PSF iyo hogaankooda.
XAFIISKA WARARKA SIYAASADA
DAYNIILE.COM
