XIGASHO LAACIB.NET
Kooxda Arsenal ayaa sii wada dadaallada ay ugu jiraan inay la saxiixdaan weeraryahanka Sporting ee Viktor Gyokeres, sida uu sheegay suxufiga Talyaaniga ah Nicolo Schira.
Weeraryahanka 26-jirka ah ee u dhashay dalka Iswidhan ayaa weli ah bartilmaameedka ugu weyn ee weerarka Gunners xagaagan. Wadahadallo ayaa socda oo u dhexeeya Arsenal iyo wakiillada ciyaaryahanka, iyadoo kooxda Ingiriisku ay horay u soo bandhigtay heshiis soconaya illaa sanadka 2030.
Sporting waxay dalbanayaan €65 milyan oo euro si ay u fasaxaan Gyokeres, kaasoo xilli ciyaareed cajiib ah ku qaatay Portugal, isagoo dhaliyay 54 gool isla markaana caawiye ka noqday 12 kale, dhammaan 52 kulan oo uu u saftay Sporting tartamada oo dhan.
