XIGASHO LAACIB.NET

Liverpool ayaa gaartay guul weyn kadib markii ay 5-1 ku xasuuqeen Tottenham Hotspur kulankii 34-aad ee horyaalka Premier League ee ka dhacay garoonka Anfield.

Tottenham ayaa hoggaanka la wareegtay daqiiqaddii 12aad markii Dominic Solanke uu dhaliyay goolka koowaad, balse Liverpool ayaa si degdeg ah uga jawaabtay iyadoo Luis Díaz uu goolka barbaraha keenay daqiiqaddii 16aad.

Mac Allister ayaa u dhaliyay Liverpool goolkii labaad daqiiqaddii 24aad, halka Cody Gakpo uu dhaliyay goolkii saddexaad daqiiqaddii 34aad ee qeybtii hore.

Daqiiqaddii 63aad ee ciyaarta, Mohamed Salah ayaa dhaliyay goolka afraad ee Liverpool, waxaana Udogie si kama’ ah isaga dhaliyay goolkii shanaad ee Tottenham daqiiqaddii 69aad.

Guushan ayaa Liverpool u korodhsatay dhibcaha ilaa 82, iyagoo si rasmi ah ugu guuleystay horyaalka Premier League, halka Tottenham ay kusii jirto kaalinta 16aad iyadoo leh 37 dhibcood.

XIGASHO LAACIB.NET

‘Waa maxay awooddayda’ – Mohamed Salah oo ka hadlay saameynta ‘layaabka leh’ ee uu ku yeeshay guusha Liverpool, xiddiga Masarna qirtay in hanashada Premier League ee xilli ciyaareed kaan ay “ka sii duwan tahay” sidii uu ula guuleystay horyaalkii hore Jurgen Klopp.

Mohamed Salah ayaa shaaca ka qaaday sababta ay hanashada horyaalka Premier League ee 2024-25 ugu gaar tahay marka loo barbardhigo guushii hore ee ay la gaareen tababarihii hore ee kooxda.

Salah ayaa sidoo kale ahaa xiddig muhiim ah markii Liverpool ay 2020 qaaday horyaalkeedii ugu horreeyay muddo 30 sano ah, balse wuxuu qirtay in uu dareemayo in guusha sanadkan ay ka macno badan tahay tii hore, isagoo sheegay in la qabsashada tababare cusub iyo koox cusub ay muujinayso qiimaha uu leeyahay Anfield.

Salah ayaa BBC Sport u sheegay:

“Waa wax layaab leh. Inaan horyaalka ku guuleysto iyo saameynta aan yeeshayba waa wax aan la rumaysan karin. Aniga ahaan, horyaalkaan wuxuu ahaa dareen gaar ah. Jurgen [Klopp] muusan joogi , ciyaartooy kale oo aan si weyn u ixtiraamo ma joogin, balse inaan guuleysanay iyadoo tababare cusub iyo koox cusub nala joogaan waxay muujinaysaa waxa aan awoodno.”

XIGASHO LAACIB.NET

Pep Guardiola ayaa sheegay in Manchester City aysan gabi ahaanba ku faraxsaneyn xilli ciyaareedkooda inkastoo ay garaaceen Nottingham Forest si ay u gaaraan final-ka FA Cup.

City ayaa si raaxo leh 2-0 ugu garaacday Forest garoonka Wembley, iyagoo xaqiijistay inay gaaraan final-kii FA Cup ee saddexaad oo xiriir ah, taasoo ka dhigeysa kooxdii lixaad ee taariikhda sameysa sidaas. Laakiin tababaraha ayaa wali ka fogaa inuu ku qanacsan yahay ololaha kooxdiisa, maadaama Liverpool ay si rasmi ah uga guuleysteen horyaalka Premier League iyagoo 5-1 ku garaacay Tottenham Axaddii.

City ayaa 21 dhibcood ka dambeeysa Liverpool iyadoo 4 ciyaarood oo kaliya ka harsan tahay xilli ciyaareedka, waxayna u muuqataa inay dhammaystiri doonaan xilli ciyaareedkooda iyagoo leh dhibcaha ugu hooseeya tan iyo markii Guardiola uu tababare ka noqday 2016. Waxa kale oo ay ku fashilmeen inay gaaraan 16-ka kooxood ee ugu dambeeya ee Champions League markii ugu horeysay tan iyo 2012, kadib markii Real Madrid ay 6-3 ku garaaceen ciyaartii wareega 16-ka, iyadoo ay ka dhigeen 22-aad 36 kooxood, iyagoo kaliya guuleystay saddex kulan.

“Dhabtii Xilli ciyaareedkaan ma fiicna,” Guardiola ayaa u sheegay warbaahinta. “Waxaan ka dambeeynaa Liverpool kun milyan oo dhibcood. Taasi ma fiicna. Eeg Champions League. Waxaan guuleysannay hal kulan? Ama Laba kulan? Waxaanu markasta ahaan jirnay mishiin, laakiin hadda ma fiicna xaalkeenna, laakiin waxyeellada aan laheen ayaa yaraatay. Naadigu waa inay qaataan go’aan sax ah si xilli ciyaareedka soo socda uu u fiicnaado.”

XIGASHO LAACIB.NET

Mustaqbalka xiddiga Real Madrid, Vinicius Jr, ayaa wali ku jira shaki, iyadoo ay jirto xan ku saabsan inuu ka tagayo kooxda, iyadoo lala xidhiidhinayo kooxo ka ciyaara horyaalka Sucuudiga.

Warar dhowaan soo baxay ayaa sheegayey in Vinicius Jr uu ku dhowyahay inuu heshiis cusub u saxiixo kooxda Los Blancos. Si kastaba ha ahaatee, wakiilada xiddiga ayaa si cad u beeniyay wararkaasi, iyagoo sheegay inaysan jirin wax heshiis cusub ah oo la saxiixay.

Vinicius Jr, oo ka mid ah xiddigaha ugu wanaagsan kooxda Real Madrid tan iyo markii uu ku soo biiray, ayaa ku guuleystay abaalmarino badan oo ay ka mid yihiin horyaalka La Liga iyo Champions League. Guulihii uu gaadhay ayaa muujinaya muhiimaddiisa kooxda, iyadoo wakiilkiisa uu diiday inuu ka hadlo mustaqbalka xiddiga ama wax wada hadal ah oo ku saabsan heshiis cusub.

Xiddiga reer Brazil ayaa weli leh mustaqbal ifaya oo kooxda, iyadoo Real Madrid ay xilligan u muuqato inay si joogto ah ugu dadaalayaan inay xoojiyaan awoodda kooxda.

Ma jiraan wax war ah oo ku saabsan kooxaha Vinicius Jr lala xiriirinayo, waxaana la filayaa in go’aanka mustaqbalkiisa uu sii ahaado  mid xiiso leh oo indhaha lagu wada hayo.