Hannaanka loo maareeyey Gogosha Wadatashiga ee uu Madaxweyne Xasan Sheekh Maxamuud ku baaqay 1-dii bishan Juun, cidda lagu martiqaaday iyo ajandaha guud ee la tilmaamay, intuba waxa ay muujinayaan in madaxweynuhu uu wali ka leexanayo inuu si dhab ah u wajaho xaaladda siyaasadeed ee dalka ka jirta iyo culeyska ay leeyihiin arrimaha masiiriga ah ee khilaafaadku ka taagan yihiin.
Sida aan marar badan ku talinnay arrimaha heshiiska siyaasadeed u baahan ee taabanaya masiirka shacabka Soomaaliyeed iyo nidaamka dowladnimada dalka waa mas’uuliyad wadareed ay tahay in talo-wadaag ay ka yeeshaan dhammaan heer Federaal iyo heer Dowlad-goboleed, si loo ilaaliyo midnimada dalka iyo wax wada-lahaanshaha dadka Soomaaliyeed, waxaase muuqata inuusan Madaxweynuhu wali garowsan arrintaas, uuna ku socdo siyasaasadda ku dhisan cidna loo joojin maayo.
Madaxweynuhu waxa uu u jihaystay dhabbe dalka gelinaysa qalalaase hor leh, waxaana taas marag u ah hannaanka marti-qaadka Madaxweynaha oo ah mid aan ka jawaabayn arrimaha udub-dhexaadka u ah khilaafka taagan ee ay ugu waawayn yihiin wax-ka-beddelka dastuurka iyo arrimaha doorashooyinka, isaga oo hadda qorshaynaya wax-ka-beddel horleh oo sharci darro ah oo uu ku sameeyo 11-kii cutub ee ka badqabay dastuurkii heshiiska lagu ahaa.
Marti-qaadka Gogosha Wadatashiga waxaa sidoo kale garab socda fulinta hannaan doorasho oo aan heshiis lagu ahayn taas oo ku salaysan sharciyada iyo guddiyada doorashada ee uu Madaxweynuhu samaystay, waxaana xusid mudan sida muwaadiniinta Soomaaliyeed loogu qasbayo is-diiwaangelin qasab ah looguna xad gudbayo xaquuqda aasaasiga ah ee muwaaadinka.
Haddaba, waxaan markale ku baaqaynaa si xal looga gaaro khilaafaadka siyaasadeed, loogana baaqsado dhaawac soo gaara midnimada dalka, in Madaxweynuhu uu si dhab ah u wajaho xaaladda taagan, kuna soo laabto Dastuurkii heshiiska lagu ahaa ee lagu doortay, gogosha wadatashiga iyo go’aannada masiiriga ahna ay noqdaan kuwo loo dhan yahay oo ay ka qaybqaataan dhammaan labada heer ee Dowladda.
