Safiirka Ingiriiska ee ujoogta Dalka Soomaaliya, Kate Foster ayaa walaac ka muujisay xaaladda ka taagan Magaalada Laascaanood ee Xarunta Gobolka Sool, iyadoona dhinacyada ugu baaqday inaanay xaaladda kaga sii darin.

“Waxaan ka walaacsanahay dhacdooyinkii ugu dambeeyay ee ka dhacay Laascaanood, oo sababay dhimasho iyo dhaawac soo gaaray dad rayid ah.” Ayay tiri Kate Foster.

Kate Foster ayaa Twitter-keeda ku sheegtay “Waxaan u soo jeedinaynaa dhammaan dhinacyada in ay is dejiyaan, lagana fogaado khasaare kale, si nabad ahna lagu xaliyo arrinta.”

Dhanka kale Xarunta Xuquuqul Insaanka Madaxabannaan ee Somaliland ayaa cambaareysay in hub loo adeegsado dadka rayidka ee bannaanbaxyada ka wada Magaalada Laascaanood.

Xarunta ayaa qoraal ay soo saartay waxay ku dalbatay in baaritaan lagu sameeyo gacanta adag, ee ay ciidamadu ku wajahayaan dadka shacabka ee ka gadoodsan dilalka ku soo noqnoqday magaaladaasi.

Xarunta ayaa ku baaqday in la xushmeeyo xaqa bannaanbaxayaasha iyo codkooda, sida uu dastuurka siinayo.

Bannaanbaxyada 7-dii maalmood ee ugu dambeysay ka socday Magaalada Laascaanood ayaa ka dambeeyay, kadib dilkii habeenkii Isniinta magaaladaasi loogu geystay Cabdifitaax Cabdullaahi Cabdi (Hadraawi) oo ka mid ahaa dhallinyarada deegaanka ee siyaasadda ku jiray, kana tirsanaa Xisbiga Mucaaradka Somaliland ee Waddani.

Magaalada waxaa ku soo noq noqday dilalka kooxaha aan la garaneyn ay magaaladaasi ugu gaysanayaan dadka ugu saamaynta badan bulshada dhexdeeda.

LEAVE A REPLY

Please enter your comment!
Please enter your name here