Kooxda kubadda cagta Liverpool ayaa xasuuq weyn u geysatay Manchester United oo ay dhax jiid-jiidday Anfiled iyada oo ku burburisay 7-0, xilli xiddigihii waaweynaa ee Red Devils ay waji gabax kaga baxeen garoonka iyaga oo madaxa foorarinaya.
Erik ten Hag aya geli doona buuga taariikhda Manchester United ee dhinaca murugada iyo fadeexadda ah, waxaana lagu xasuusan doonaa inuu noqonayo tababarihii guul-darradii ugu weynayd abid usoo hooyey kooxda, balse kalidii kuma ahaanayo waxaana la wadaagaya laba macallin oo kale.
Lix gool oo qaybtii labaad ay Liverpool ka dhalisay Manchester United ayaa ah wax aan hore looga arag horyaalka Premier League, laakiin fadeexaddu waa goolka qaybtii hore uu kusii furay Cody Gakpo oo tirada sii kordhinay.
Mohamed Salah, Darwin Nunez iyo Cody Gakpo ayaa min laba gool dhaliyey iyaga oo taageereyaasha illowsiiyey qaab ciyaareedkii xumaa ee ay kusoo jireen. Sidoo kalena Roberto Firmino oo lasii sagootiyayo xilli ciyaareedkan ayaa midka bahdilaadda ah ee toddobaad raaciyey.
