Jowhar (dayniiile.com)-Xaafada Hanti-wadaag ee Magaalada Jowhar waxaa laga soo sheegayaa in dadkii deganaa badankood ka barakaceen roobab waa weyn oo ka da’ay darteed.
Sida ka muuqatay muuqaal uu Tv-ga qaranka ka soo diyaariyay Xaafada Hanti-wadaag waxaa muuqanaya in biyihii roobku isu badaleen sida wabiga.
Laanta suuqa-xoolaha oo hoos tagta Xaafad Hanti-wadaag ayaa gabi ahaanba qoysaska qaar ku go’doonsan yihiin biyaha ka dhashay daadadka roobka dartiis.
Dadka shacabka ee reer Jowhar gaar ahaan kuwa Xaafada Hanti-wadaag ayaa dalbanaya in caawimaad lala soo gaaro madaama ay biyaha roobka dartood xitaa qaarkood cunto dalbanayaan.
Gudoomiyaha Xaafada Hanti-wadaag Cusmaan Xuseen (Cusmaan Gaab) ayaa codsaday in cid kasta oo wax ka gasha ay ka qeybqadato xal u helida biyaha xaafadaasi harqiyay.
Cusmaan Gaab wuxuu sidoo kale ku baaqay in dadka wax heysta ay kaalmeeyaan shacabka dhibaateysan oo u baahan in raashin iyo agabyada kale laga saacido.
XAFIISKA WARARKA
DAYNIIILE.COM
