Ururka Xisbullah ee dalka Lubnaan ayaa sheegtay mas’uuliyadda weerar lagu qaaday xarun ciidan oo ku taalla waqooyiga Israa’iil.
Weerarkaasi waxaa ku dhaawacay ugu yaraan 14 askari, Ururka Xisbullah ayaa tilmaamay in weerarkaani uu ahaa mid aargoosi ah kadib duqeyn Yuhuuda kaga timid markaasoo ay dhinteen xubno Ururka ka mida.
Kooxdan la safan Iran ayaa sheegtay in ay weerar isugu jira gantaalo la hagayay iyo diyaaradaha aan duuliyaha lahayn ay ku qaadeen xarun cusub oo sahan ciidan ah oo ku taal Arab al-Aramshe, oo ah tuulo ay ku badan yihiin Carabta oo ku taal waqooyiga Israa’iil una dhaw xadka Lubnaan.
Milatariga Israel ayaa sheegay in 14 ka mid ah askartooda ay ku dhaawacmeen weerarkii Arbacadii lix kalena ay xaaladoodu halis tahay.
Dhanka kale milatariga Israel ayaa sheegay in diyaaradahooda dagaalka ay duqeeyeen xarumaha Xisbullah ee bariga Lubnaan.
Weerarkan ayaa kusoo beegmaya maalin kadib markii Israa’iil ay duqaymo ka fulisay koonfurta Lubnaan ay ku dishay saddex qof oo uu ku jiro taliye ka tirsan Xisbullah oo ay ciidamada Israa’iil ku sheegeen magaciisa Ismail Yusaf Baz.
Israa’iil waxay sheegtay in duqaymahaas hore ay ku dishay laba taliye oo ka tirsan ururka Xisbullah iyo mid kale halka ay kooxdu sheegtay in saddex ka mid ah la dilay.
Maamulka maxalliga ah ee Israel ayaa sidoo kale sheegay in saddex qof ay ku dhaawacmeen weerar ka yimid Lubnaan horaantii Talaadadii.
XAFIISKA WARARKA
DAYNIILE.COM
