Madaxweynaha Koonfur Afrika Cyril Ramaphosa iyo Madaxweynaha Ruushka Vladimir Putin
Koonfur Afrika ayaa ku casuuntay madaxweynaha Ruushka Vladimir Putin shir madaxeedka bisha Agoosto
Isku day kasta oo lagu doonayo in lagu xiro Vladimir Putin haddii uu booqdo Koonfur Afrika waxay noqon doontaa ku dhawaaqid dagaal ka dhan ah Ruushka, ayuu yiri madaxweynaha dalkaas.
Cyril Ramaphosa ayaa digniintan jeediyay iyadoo toddobaadyo ay ka harsan yihiin shir caalami ah oo ka dhacaya Johannesburg, kaasoo lagu casuumay madaxweynaha Ruushka.
Balse hadii Mr Putin uu ka tago dhulka Ruushka, waxa uu muteysan doonaa amar lagu soo xirayo maxkamada caalamiga ah ee Dambiyada (ICC).
Waxaa lagu eedeeyay in uu galay dambiyo dagaal intii uu socday dagaalka Ukraine.
Ruushku waxa uu si joogto ah ugu tilmaamay waaranka qabashada ICC mid aad looga xumaado oo sharci ahaan aan waxba ka jirin sababtoo ah waddanku xubin kama aha ururka.
Koonfur Afrika waa saxiixe ICC, sidaas darteed waa in ay gacan ka geystaan sidii loo soo qaban lahaa.
Si kastaba ha ahaatee, waxay diiday in ay ixtiraamto waajibaadkaas hore – u oggolaanshaha in 2015 si badbaado leh loo maro madaxweynihii Suudaan Cumar al-Bashiir oo markaa loo raadinayay dambiyo dagaal oo ka dhan ah dadkiisa.
Mr Putin ayaa lagu casuumay Koonfur Afrika bisha August, markaasoo uu dalkaasi martigelinayo shir madaxeedka xubnaha dalalka Brics – oo loo soo gaabiyo Brazil, Russia, India, China iyo South Africa. Kooxdan dhaqaalahoodu aadka u kobcayo ayaa dadka qaarkiis u arkaan beddelka kooxda G7 ee dhaqaalaha horumaray
