Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale) ayaa Aqalka Dowladda Hoose ee Xamar Casho sharaf ugu sameeyey mas’uuliyiin ka kala socday Baarlamaanada Maamul Goboleedyada dalka, Wasiiradda Dastuurka Maamul Goboleedyada & Gobolka Banaadir, Guddiga Madaxa banaan ee arrimaha Dastuurka iyo xubno kale oo Magaalada Muqdisho ugu soo gaba-gaboobay La-tashiga ku aadan soo jeedinta wax ka badalka cutubyo ka tirsan Dastuurka dalka.
Munaasabadaan ayaa waxaa goobjoog ka ahaa Wasiirka Wasaaradda Cadaaladda iyo Dastuurka XFS Mudane Xasan Macalin, Guddoomiye Kuxigeenka Amniga iyo Siyaasadda G/Banaadir, Xoghayaha Guud ee Maamulka G/Banaadir iyo Mas’uuliyiin kale oo isugu jira heer Federaal, Maamul Goboleed iyo Gobolka Banaadir.
Duq Muqdisho oo khudbad dhinacyo badan taabaneysa halkaasi ka jeediyay ayaa boogaadiyay La-tashiyadda ku aadan soo jeedinta wax ka badalka Cutubyo ka tirsan Dastuurka dalka. Waxa uuna sheegay in la joogo xilligii miiska lasoo saari lahaa xuquuqda Gobolka Banaadir iyo Maqaamka Muqdisho.
—DHAMMAAD—